МАНИСА
Ибрахим КАХРИМАН
Занаетчијата Фаик Уналер веќе шест децении со иста љубов работи во својата работилница во центарот на турскиот град Акхисар и произведува мали кочии и коњски коли што ги красат дворовите во сите делови на Турција и пошироко, пишува Anadolu Agency (AA).
Уналер како 13-годишник почнал да работи како чирак во занаетчиска работилница каде што се правеле коњски запрежни коли, а десет години подоцна се стекнал со титулата мајстор и отворил своја работилница.
Веќе две и пол децении Уналер е во пензија, но и понатаму работи во работилницата, а во тоа не го спречи ниту фактот што кочиите и запрежните коли веќе не се користат во секојдневниот живот на луѓето.
„Жал ми е што занаетчиските ракотворби повеќе не ги интересираат младите луѓе. Решив да правам минијатурни украсни кочии за да ја зачувам оваа традиција и убавини“, вели Уналер во разговорот со АА.
Тој рече дека има многу нарачки од цела Турција, и дека му се потребни 15 дена за да направи една минијатурна кочија.
„Најтешкиот дел од работата е да го одржите ветувањето што му го давате на муштеријата. Квалитетот и времето на испорака отсекогаш ми биле еден вид притисок што ме тера постојано да учам и да бидам сѐ подобар во мојата работа. Ова е случај и денес, кога имам 73 години“, вели Уналер.
На прашањето до кога има намера да работи, Уналер рече дека ќе работи сѐ додека е здрав.
„И кога би сакал, не би можел да ја оставам работата. И сега ја сонувам работата и во сон мерам дијаметар на тркалата и дизајнирам кочии. Тоа едноставно е мојот начин на живот“, заклучи Уналер.
