ГАЗА (АА) – Палестинскиот бодибилдинг инструктор, Мухамед Сакр, кој ја загубил десната нога во израелски напад врз Појасот Газа, и покрај сите потешкотии не се откажува од својата страст кон спортот, пишува Анадолу.

Како последица на двегодишните напади врз Газа, илјадници деца и возрасни лица останаа трајни инвалиди. И покрај тоа што сега им недостасува дел од телото, овие луѓе се обидуваат да го продолжат животот и да се приспособат на новата состојба во која се наоѓаат.

Палестинскиот тренер Сакр, кој живее во градот Кан Јунис, во јужниот дел на Газа, во израелските напади ја загуби ногата, но со својата упорност одново успеа да ја најде смислата на животот.

Мухамед Сакр, кој редовно ја посетува спортската сала, без никаков напор ги изведува вежбите кои дури и здравите луѓе ги прават со потешкотии.

И покрај тоа што има само една нога, тој скока на јаже и работи вежби за зајакнување на горниот дел од телото.
Сакр не само што спортува во салата, туку продолжува да работи како тренер и им помага во процесот на рехабилитација на луѓе кои ја делат истата судбина со него.

Тој рече дека спортската сала се состои од две различни згради, за мажи и за жени, но по израелските напади, зградата за мажи била целосно уништена, а опремата неупотреблива, додека зградата за жени претрпела само 50 отсто штета.

„По излегувањето од болница, повторно се вратив во спортската сала, каде што со силна желба и голема упорност се обидував да се приспособам на повредата што ја преживеав. Мојот инвалидитет не успеа да ме запре. Објектот одново го изградивме и повторно се вратив на спортот и работата како тренер”, вели Мухамед Сакр.