Долги редици пред пекарите во Газа: „Немаме брашно за утре“

ГАЗА (АА) - Проблемите поради исклучувањето на струјата и водата се зголемуваат во Газа, каде деноноќно продолжуваат израелските напади, јавува Анадолу.

Палестинците формираа долги редици пред пекарите за да купат леб.

„Имаме потешкотии во снабдувањето со брашно, брашно имаме доволно за денеска, но немаме брашно за леб за утре“, вели пекарот Енес Бешир.

Пред неколку дена целосно е прекинато снабдувањето со електрична енергија во областа со повеќе од два милиони жители, откако единствената електрана во Газа престана да работи поради недостиг на гориво.

Минатиот викенд, во драматична ескалација на тензиите на Блискиот Исток, израелските сили започнаа континуиран воен напад врз Појасот Газа како одговор на воената офанзива на палестинската група Хамас на израелска територија.

Хамас рече дека операцијата е одмазда за нападот на џамијата Ал Акса во окупираниот Источен Ал-Кудс (Ерусалим) и насилството на еврејските доселеници врз Палестинците.

Израелската војска потоа започна операција против позиции на Хамас во Појасот Газа.