Благодарение на турската операција „Извор на мирот“, илјадници сириски цивили се вратија во своите домови

ТЕЛ АБЈАД (АА) - ЕШРЕФ МУСА

Многу сириски семејства продолжуваат да се враќаат во своите домови во Тел Абјад, откако тоа подрачје беше ослободено од терористите преку операцијата „Извор на мирот“, што ја започна Турција, пишува Агенција Анадолија (АА).

Неколку илјади семејства од Тел Абјад, бегајќи од тиранијата и притисокот на терористите од ЈПГ/ПКК и ДЕАШ, побегнаа во Турција и во подрачјата под контрола на опозицијата во северна Сирија.

Откако центарот на Тел Абјад со операцијата „Извор на мирот“ беше ослободен на 13 октомври 2019 година, многу порано раселените семејства почнаа да се враќаат во подрачјата од кои беа протерани.

Поради воспоставувањето мир и стабилност во тој регион, како и поради преземањето активности за развој на споменатите подрачја, но и поради помошта што продолжува да пристигнува од Турција, голем број цивили се одлучија да се вратат.

Екипите на Агенција Анадолија на првата годишнина од ослободувањето на центарот на Тел Абјад разговараа со цивилите што решија да се вратат.

Меѓу нив е и Махмуд Халаф Абу Укба, кој рече дека во 2014 година избегал од терористите на ДЕАШ и побарал засолниште во Азаз, кој е под контрола на опозицијата.

Абу Укба рече дека таму поминал неколку години.

„Благодарение на операцијата што ја започнаа Турција и Сириската национална војска, се вративме во својот крај. Среќни сме што сме во своја куќа“, рече тој.

Додаде дека се отстранети проблемите со снабдување со електрична енергија и вода, и дека состојбата во тоа подрачје се подобрува.

Ахмед Хафјан, од Тел Абјад, побегнал во Џараблус, недалеку од границата со Турција, бидејќи терористите на ЈПГ/ПКК во 2015 година го окупирале подрачјето.

Хафјан, татко на пет деца, изјави дека се среќни што се вратиле дома.

„Благодарение на операцијата, нашата област е ослободена. Со поддршка на Турција се вративме во своите домови. Бог да им даде секое добро“, рече Хафјан.

Тој додаде дека терористите на ЈПГ/ПКК им ја уништиле куќата откако неговите браќа се приклучиле на Сириската национална војска (СНВ) и пружиле поддршка на операцијата.

„Добив мозочен удар кога видов дека мојата куќа е срушена. Поради тоа тешко ми е да зборувам. Сега престојувам во куќата на братот. Ја замолувам за помош Турција и луѓето со добро срце за да можам да ја санирам мојата куќа“, рече тој.

Неговиот 12-годишен син Исмаил рече дека веќе шест години не ги видел роднините, бидејќи поради притисокот на терористите избегале во Европа.

„Се надевам дека повторно ќе се вратат и дека заедно ќе си играме. Нашата куќа е срушена. Молиме за помош за да може да се поправи“, рече тој.

Челникот на Локалното собрание на Тел Абјад, Вејл Хамдо, изјави дека се решени проблемите со снабдувањето со леб, вода и електрична енергија, а припадниците на безбедносните сили се грижат и за мирот.

„По операцијата 'Извор на мирот', продолжува доброволното и безбедно враќање во ова подрачје. Досега се вратија околу 5.000 цивили. Како што се подобруваат условите за живот, оваа бројка ќе се зголемува“, рече Хамдо.