Туркије и Египет ја зајакнуваат соработката во различни сектори со цел за трговска размена од 15 милијарди долари

ИСТАНБУЛ (АА) - Анкара одлучно напредува кон својата цел за зголемување на обемот на трговската размена со Каиро на 15 милијарди долари во следните пет години, изјави денес турскиот претседател Реџеп Таип Ердоган, јавува Анадолу.

На заедничката прес-конференција со неговиот египетски колега Абдел Фатах ал-Сиси, кој престојува во посета на главниот град Анкара, Ердоган рече дека Туркије и Египет ја потврдиле својата решеност да ја унапредат соработката во секој сектор, вклучително и индустријата, одбраната, здравството, животната средина и енергетиката.

„Трговската и економската соработка ја формираат најсилната димензија на нашето партнерство“, рече Ердоган. „Во текот на изминатите 10 години продолживме да бидеме меѓу првите пет трговски партнери на Египет. Одлучно напредуваме кон нашата цел да го зголемиме обемот на трговска размена на 15 милијарди долари во следните пет години.

Турскиот претседател, исто така, го истакна значајниот придонес на турските бизнисмени во египетската економија, со инвестиции од близу 3 милијарди долари. Тој ги повика турските претприемачи дополнително да ги прошират своите инвестиции и да ги поканат египетските инвеститори во Туркије.

„Ние ќе ги унапредиме нашите односи на вин-вин начин“, додаде тој.

Потсетувајќи дека следната година двете земји ќе ја прослават 100-годишнината од воспоставувањето на меѓусебните дипломатски односи, Ердоган рече: „Ние сме две древни земји колевки на цивилизации кои ја обликуваат човечката историја. Ние постојано ги зајакнуваме длабоките и повеќеслојни односи меѓу нашите земји преку нашите заеднички напори“.

Ердоган истакна дека Туркије и Египет имаат заеднички став за палестинското прашање, додавајќи дека нивниот придонес за регионалниот мир и стабилност е витален.

Ал Сиси пристигна во официјална посета на Туркије, негова прва посета по преземањето на функцијата, на покана на Ердоган, кој го посети Каиро во февруари.