ИСТАНБУЛ (АА) – Соединетите Американски Држави (САД) денес потпишаа трговски договори со Малезија и Камбоџа и договор за клучни минерали со Тајланд откако го надгледуваа потпишувањето на мировниот договор меѓу Пном Пен и Бангкок во Куала Лумпур, јавува Анадолу.

Претседателот на САД, Доналд Трамп, ја водеше церемонијата, заедно со малезискиот премиер Анвар Ибрахим, во придружба на камбоџанскиот премиер Хун Манет и тајландскиот премиер Анутин Чарнвиракул.

„Заедно со овој мировен договор, потпишуваме и голем трговски договор со Камбоџа и многу важен договор за клучните минерали со Тајланд“, рече Трамп.

Тој ја поврза континуираната економска соработка со одржувањето на мирот меѓу Камбоџа и Тајланд. „Соединетите Американски Држави ќе имаат силна трговија и соработка, трансакции... со двете земји, сè додека живеат во мир“, рече тој. Двете земји ги прекинаа граничните непријателства уште во јули.

Чарнвиракул објави заедничка изјава „за рамката на договорот меѓу САД и Тајланд за реципрочна трговија“, со цел за завршување на преговорите за царините до крајот на 2025 година.

Според изјавата, Тајланд се согласува да ги елиминира царините за приближно 99% од стоките, додека САД одржуваат реципрочни царини од 19%.

Рамковниот трговски договор се однесува на нецаринските бариери, работничките права, заштитата на животната средина, интелектуалната сопственост, вклучувајќи ги и географските ознаки и обврските за дигитална трговија.

Владите, исто така, потпишаа меморандум за разбирање за соработка во областа на клучните минерали, „што дополнително ќе промовира отпорни и одржливи синџири на снабдување во годините што доаѓаат“, рече Чарнвиракул.

Меморандумот за разбирање има за цел да го зајакне управувањето со секторот за ресурси на Тајланд, да ги промовира партнерствата меѓу компаниите од САД и Тајланд и да го интегрира Тајланд во безбедни глобални синџири на снабдување.

Двете земји ќе споделуваат техничка експертиза, ќе се координираат за приоритетни проекти и ќе ги заштитат своите пазари на клучни минерали од нефер трговските практики.

- „Одлично за двете земји“ -

Камбоџа е посветена на елиминирање на царините за 100% на американските индустриски стоки и земјоделски производи, додека Вашингтон ќе одржува реципрочни царини од 19%.

Договороте се однесува на нецаринските бариери, ги штити меѓународно признатите работнички права и вклучува обврски за дигитална трговија, услуги, инвестиции, интелектуална сопственост и практики на државни претпријатија.

„Ер Камбоџа“ ќе соработува со „Боинг“ за развој на воздухопловниот екосистем на земјата.

Трамп го нарече трговскиот договор со Камбоџа „одличен за двете земји“.

- Сеопфатен договор со Малезија -

Со Малезија, покрај „историски“ трговски договор, потпишан е и меморандум за разбирање, кој ќе доведе до проширување на трговијата и инвестициите за клучните минерали.

Трговскиот претставник на САД, Џејмисон Грир, рече дека меморандумот „обезбедува трговските инвестиции за клучните минерали меѓу Малезија и САД да бидат што е можно послободни и што е можно поотпорни“.

Тој истакна дека овие минерали се клучни за производството, технологијата и американската економија и ја истакна важноста на непречен и безбеден синџир на снабдување.

Според трговскиот договор, Малезија се обврза да обезбеди значителен преференцијален пристап за американските индустриски стоки, меѓу кои хемикалии, машини, метали и возила, како и за земјоделски извоз и етанол како гориво.

Малезија се обврза да се осврне на нецаринските бариери, да ги спроведува законите за животна средина, да се бори против нерегуларните пазари и да спречи принудна работа. Договорот вклучува обврски за интелектуална сопственост, дигитална трговија и државни претпријатија.

Куала Лумпур, исто така, се обврза да се воздржи од забрана или наметнување квоти за извоз на клучни и ретки минерали во САД.

Договорите наведуваат значајни комерцијални трансакции, вклучувајќи ја набавката на 30 авиони од страна на Малезија со опции за уште 30, 150 милијарди долари во полупроводници, воздухопловни компоненти, опрема за центри за податоци и до 3,4 милијарди долари годишно во купувања на течен природен гас и 70 милијарди долари во инвестиции во американски капитални фондови.

Посебен меморандум за клучни минерали меѓу САД и Малезија го отсликува договорот на Тајланд, фокусирајќи се на управувањето со секторот, билатералните партнерства и безбедноста на синџирот на снабдување.

Во 2024 година, вкупниот обем на трговска размена меѓу САД и Малезија изнесуваше 86,5 милијарди долари, трговијата меѓу САД и Камбоџа беше 13,5 милијарди долари, додека САД и Тајланд разменија стоки и услуги во вредност од 88,3 милијарди долари.