Шаќири: „Нa 255.000 основци и средношколци им посакувам вредно да учат и да ги надоградуваат знаењата“

СКОПЈЕ (АА) – Министерот за образование и наука на Северна Македонија, Јетон Шаќири, истакна дека во Северна Македонија учебната 2022/2023 година ќе ја почнат 255.000 основци и средношколци, и на сите ученици им посака вредно да учат и да ги искористат сите можности за надоградување на знаењата и вештините, пренесува Агенција Анадолија (АА).

Според писменото соопштение од Министерството, министерот, на првиот училиштен ден од учебната година најпрво го посетил новоизграденото Основно училиште „Гоце Делчев“ во скопската општина Илинден.

Министерот Шаќири, повикувајќи ги учениците вредно да учат и да ги искористат сите можности за надоградување на знаењата и вештините, подвлече дека тоа се единствените вредности кои никој не може да им ги одземе, а кои можат да ги однесат до посакуваните цели во животот.

„Ние како министерство, заедно со другите надлежни институции од образованието, работевме да обезбедиме услови за успешно одвивање на воспитно-образовниот процес, вклучително обезбедување нови учебници и наставни програми, обука на наставниот кадар и зголемување на мотивираноста преку повисоки плати за 15 % почнувајќи од овој месец, како и подобри услови за настава онаму каде што беше најприоритетно да се инвестира. Се градат неколку нови училишта и спортски сали, 30-ина училишта се реконструираат, се набавија 265 кабинети по природни науки. Сево ова е вложување во поквалитетно образование, какво што заслужуваат сите деца“, рече Шаќири.

Меѓу другото, министерот се заблагодари и на општините поради посветувањето кон подобрување на условите за настава и за квалитетен воспитно-образовен процес во новата учебна година.

Oваа учебна година за првпат во училишните клупи седнуваат околу 18.000 првоодделенци.

Укажувајќи дека тие тргнуваат на патот кој ќе ги подготви да си го изградат личниот живот и да се вложат во иднината на татковината, министерот Шаќири рече дека наставниците се тие кои ќе им ги отвораат видиците, а родителите/старателите тие кои ќе им бидат поддршка во градењето перспективна иднина.