Учесници на „Марш на мирот“: Голем број деца во колоната велат дека геноцидот во Сребреница нема да се повтори

НЕЗУК (АА) - Оваа година голем број деца се во колоната „Марш на мирот“ што утринава тргна од Незук кај Сапна на патот Поточари за да им оддаде почит на илјадниците мажи и момчиња убиени во геноцидот во Сребреница во јули 1995 година, јавува Анадолу.

Во колоната од околу 5.000 луѓе, кои во следните три дена ќе поминат маршрута од околу 100 километри, има и голем број деца што со родителите или бабите и дедовците сакаат да им оддадат почит на жртвите во геноцидот во Сребреница.

Фарис Герзиќ (11) пристигна од Босанска Крупа.

„Третпат сум тука. Доаѓам со брат ми и татко ми. Не ми е тешко да печашам, тешко ми е само првиот ден. Станува жешко, но секогаш во главата ни се нашите маченици што го минувале овој пат. Од својата шеста година знам за Сребреница и затоа одлучив и да пешачам“, изјави Фарис.

На „Марш на мирот“ од Босанска Крупа дојде и Ела Рекиќ (14).

„Првпат сум тука. Дојдов за да дознам повеќе за геноцидот во Сребреница, да го поддржам сето ова. Сакаме геноцидот во Сребреница да не се повтори. Не би сакала некој да го доживее тоа повторно“, рече Ела.

Десетгодишната Елиф Рамиќ од Сараево дошла на „Марш на мирот“ со својот дедо Мехмед.

„Вторпат сум на 'Марш на мирот'. Тука сум со дедо ми и моите пријатели. Не ми е тешко да одам. Дедо ми и претходно одеше на 'Марш на мирот'“, изјави Елиф.

Нејзиниот дедо пешачи веќе 20 години. Како што рече, на „Марш на мирот“ дошол со своите две внуки.

„Тие поминуваат повеќе километри од нас. Одат напред, па се враќаат и така натаму. Добро го поднесуваат патот“, вели Мехмед.

Меѓу најмладите учесници на годинашниот „Марш на мирот“ е и деветгодишниот Седад Мехиќ од Босанска Крупа.

„Тука сум со татко ми и брат ми. Првпат сум тука. Татко ми ме замоли да одам и јас се согласив. Многу планинарам и не се плашам од пешачење", рекол Седад.

Учесниците на „Марш на мирот“ треба да пристигнат во Поточари на 10 јули, а следниот ден да присуствуваат на колективниот погреб на гробиштата на Меморијалниот центар Сребреница - Поточари, каде што годинава ќе бидат погребани посмртните останки на уште 14 жртви на геноцидот.

„Марш на мирот“, кој годинава се организира по 20. пат во рамките на комеморацијата на 29-годишнината од бошњачкиот геноцид во „Безбедната зона на Обединетите нации“ во Сребреница, за преживеаните од Сребреница претставува еден вид третман на траума, но и обврска кон своите искуства и приказните што им ги раскажуваат и пренесуваат на помладите генерации.