Столтенберг во Тирана: НАТО е посветен на безбедноста на Албанија

ТИРАНА (АА) – Генералниот секретар на НАТО, Јенс Столтенберг во текот на посетата на Албанија рече дека НАТО е посветен на стабилноста во оваа земја, јавува Anadolu Agency (AA).

Столтенберг во текот на посетата на Албанија се состана со претседателот на земјата Илир Мета, премиерот Еди Рама и министерката за одбрана Олта Џачка.

По состанокот со Рама во Тирана, Столтенберг рече дека Албанија е многу важен партнер на НАТО. Додаде дека албанските единици даваат значителен придонес на стабилноста на Косово и борбата против тероризмот, како и во мисијата на НАТО во Авганистан.

„НАТО е посветен на безбедноста на Албанија. Благодарејќи на големата работа, Албанија претставува пример во воспоставувањето на мирот и стабилноста на Западен Балкан”, рече Столтенберг.

Тој се осврна и на политичките случувања во земјата.

„Неприфатливи се употребата на било каков облик на насилство и саботирање на демократските институции. Секое несогласување потребно е да се реши со политички дијалог и со учество во демократските процеси”, рече Столтенберг.

Најави и продолжување на инвестициските програми во воздушната база во Кочова, во Албанија.

Премиерот на Албанија, Еди Рама, рече дека на состанокот е разговарано за придонесот на Албанија во НАТО, соработката, буџетот за одбрана и слични теми.

„Не е тајна дека пристапот на Русија кон НАТО, ЕУ и интегративните процеси не е пријателски”, рече Рама.

По посетата на Албанија, Столтенберг со делегацијата од НАТО денес и утре престојува во Северна Македонија.