Советот на Град Скопје донесе одлука за давање помош на настраданите од земјотресот во Хрватска

СКОПЈЕ

Советот на Град Скопје на денешната итна вонредна седница, донесе Одлука за давање помош на настраданите од катастрофалните земјотреси во Петриње и во Загреб во Хрватска, во кои има човечки жртви и се повредени повеќе лица, пренесува Агенција Анадолија (АА).

„Со оваа одлука, како израз на солидарност за настраданите, Градот Скопје дава помош во износ од 3 милиони денари, односно 2 милиона денари на градот Петриње и еден милион денари за градот Загреб, износ кој го доделуваме на сите градови за вакви и слични неприлики", соопшти Град Скопје.

Градоначалникот на седницата изјави дека Скопје е град на солидарноста и знае што значи помош по вакви катастрофи и затоа во кординација со сите советнички групи во Град Скопје е свикана вонредна седница на Советот за да им се додели помош на пријателите од Загреб и од Петриња.

Билансот на смртно страданите лица во вчерашниот земјотрес во Хрватска е зголемен на седум.

Разорниот земјотрес со епицентар кај Петриња, вчера напладне, се почувствува ширум Хрватска. Беше со јачина од 6,2 степени по Рихтер, соопшти Сеизмолошката служба.