Северна Македонија: Спречен транспорт на дрога во вредност од 100.000 евра

СКОПЈЕ (АА) - Министерството за внатрешни работи на Северна Македонија на Автопатот Гостивар - Тетово спречи транспорт на дрога во вредност од околу 100.000 евра, пренесува Анадолу.

„На 24.03.2023 од страна на полициски службеници од Одделот за криминалистичка полиција – Сектор за недозволена трговија со дрога и опасни материи - Единица за недозволена трговија со дрога во содејство со Одделот за специјални полициски операции – САЕ Тигар, Оперативен тим Потраги при СВР Скопје и СВР Тетово се лишени од слобода две лица од с. Арачиново, Скопско, при што е спречен транспорт на околу 35 кг дрога“, се вели во соопштението на Министерството за внатрешни работи на Северна Македонија.

Се додава дека во утринските часови на наплатната станица Тетово, полициски службеници дале знак за запирање на патничко возило „ренџ ровер“, со скопски регистарски ознаки, управувано од К.А. (32), во кое сопатник бил О.А. (23).

Се вели дека лицата не ја почитувале дадената полициска наредба да го сопрат возилото, туку се дале во бегство, притоа оштетувајќи службено полициско возило, но набргу се запрени и лишени од слобода.

„При извршен преглед во багажниот простор на возилото пронајдени се 4 вреќи со марихуана, со вкупна тежина од околу 35 кг, со вредност од околу 100.000 евра. На лице место на наплатната станица Тетово излезе и јавен обвинител од ОЈО Тетово кој го раководеше увидот. Малку подоцна, по добиена судска наредба, извршени се претреси и во домовите на двете лица во село Арачиново, при што се пронајдени предмети поврзани со кривичното дело“, се нагласува во соопштението.

„Против А.К., МВР подолг временски период преземаше мерки и активности за негово пронаоѓање и лишување од слобода, бидејќи за него е распишана централна потерница поради бегство од штипскиот затвор, каде има за доиздржување затворска казна од околу 6,5 години, а се барал и по расписи за извршени повеќе кривични дела, како криумчарење на мигранти и шверц со дрога“, соопшти Сузана Прањиќ-Талевска од МВР.

Се истакнува дека двете лица се приведени во СВР Тетово и против нив во текот на денот ќе биде поднесена кривична пријава за „неовластено производство и пуштање во промет на наркотични дроги, психотропни супстанции и прекурсори“.