СКОПЈЕ (АА) - Граѓаните на Република Северна Македонија се во исчекување на започнувањето на вакцинирањето против коронавирусот (Ковид-19), а додека не започне вакцинацијата се обидуваат да се заштитат од вирусот со почитување на веќе познатите мерки, како што се носење маска, држење физичка дистанцa и дезинфекција на рацете.
Дарио Стојановски, средношколец од Скопје, во изјавата за Агенција Анадолија (АА), изразувајќи го своето мислење околу вакцинирањето вели дека сите граѓани треба да се вакцинираат.
„Мислам дека треба, мислам дека вакцината ќе биде решение на сè, на овој глобален проблем. Не треба да се плашиме, сите власти го негираат тоа дека се лоши вакцините. Штом властите го гарантираат тоа, мислам дека е доволно загарантирано“, вели Стојановски.
- „Не е во ред некој да нема воопшто вакцини, а некој да има двојно повеќе од потребното“ -
Во однос на тоа што во некои западноевропски земји вакцини има двојно повеќе отколку што имаат население, додека во земјите на Балканот, но и во другите региони, сè уште нема вакцини и не е започнат процесот на вакцинирање на населението, тој вели:
„До некаде тоа е лакомост, претерување за вакцини. Искрено не знам зошто им се тие вакцини, можеби ќе ги донираат на некоја друга држава, ама сепак мислам дека не е во ред некој да нема воопшто вакцини, а некој да има двојно повеќе од тоа што треба“, изјави Стојановски.
Живко Дуноски, пензионер од Скопје, вели дека граѓаните треба да се вакцинираат, но дека сепак вакцините доцнат. „Треба да се вакцинираме и да ја спречиме оваа пандемија. Еве слушавме на телевизија дека се порачани вакцините, но ќе доцнат, министерот даде изјава дека од 15 февруари ќе почне вакцинацијата, се надеваме дека ќе биде така“, вели тој.
„За доброто на граѓаните е сите да се вакцинираат, оние што веќе биле заразени со вирусот да се вакцинираат на крај, а оние што не биле заразени да бидат меѓу првите за вакцинирање“, порачува Дејан, граѓанин на Скопје. Немањето вакцини во земјите во регионот, додека во некои европски земји ги има повеќе отколку што имаат жители, го смета за „чист капитализам“.
„Чист капитализам. Чиста продажба, на кого му одговара на тој му продава, негово право е, тоа е приватна компанија којашто продава вакцини на оној којшто ќе даде најмногу пари. Не е етички, но кој гледа етички денеска? Сè е бизнис“, вели овој граѓанин на Скопје.
„Мислам дека ќе биде ефективно, но ќе треба да се почека да се прегледаат работите. Мислам дека ќе влијае позитивно вакцинирањето“, изјавува во анкетата на АА Блерим Идризи од Тетово.
- Процесот на набавка на вакцини против Ковид-19 сè уште во тек -
На 4 јануари оваа година, министерот за здравство на Северна Македонија, Венко Филипче, соопшти дека Северна Македонија ќе добие 800.000 вакцини против Ковид-19 од производителот „Фајзер“, а дека првите дози вакцини ќе стигнат во февруари, а потоа ќе следува пратка со поголема количина во март, април, а динамиката за цела 2021 година дополнително ќе се утврди.
Министерот Филипче ја објави и Националната стратегија за вакцинација, што ја изработија Министерството за здравство и Националната работна група за вакцинација, а Владата на РСМ ја усвои на 26 јануари оваа година.
Според утврдениот Национален план за имунизација на населението, во првата фаза предвидено е да се вакцинираат здравствените работници. Во оваа фаза, предвидено е да се вакцинираат и следните приоритетни групи: постарите возрасни лица со висок ризик да развијат болест, компликации и смртен исход, дефинирани со ризик врз основа на возраст, како и лицата постари од 70 години.
„Како приоритет здравствените работници веќе ги имаме со име и презиме како ќе примаат вакцини. Во однос на останатите граѓани, согласно возраста и хроничните болести веќе е направен списокот со име и презиме на 14.000 луѓе, кои ќе бидат повикувани само преку матичните лекари, а преку системот „Мој термин“, истакна Филипче.
Владата на Република Северна Македонија на 27 јануари објави дека започнува постапката за набавка на 200.000 дози САРС-КоВ-2, инактивирана вакцина против Ковид-19. Станува збор за нова набавка на дополнителни количини покрај оние од КОВАКС-механизмот од 833.000 дози на вакцина.
