Admir Fazlagic
01 Август 2017•Ажурирај: 01 Август 2017
СКОПЈЕ (АА) - Претседателот на Република Македонија, Ѓорге Иванов, денеска оствари средба со претседателот на Владата на Република Бугарија, Бојко Борисов, кој престојува во официјална посета на Република Македонија, пренесува Anadolu Agency (AA).
Според соопштението од кабинетот на претседателот на Македонија, Иванов и бугарскиот премиер Борисов разговарале за Договорот за пријателство, добрососедство и соработка меѓу двете земји, како и за волјата и ангажираноста на сите што во изминатиот период беа вклучени во напорите за негово усогласување.
„Со овој чин се потврдува политичката волја и заложба на двете држави за преземањето натамошни чекори кон градење меѓусебна доверба и надминување на отворените прашања“, посочил македонскиот претседател на средбата.
Претседателот Иванов, истакнал дека како и досега, така и во иднина ќе се залага за континуирано унапредување на добрососедските односи.
„Неопходно е заеднички да се соочуваме со предизвиците, во исто време бранејќи ги своите национални интереси. Токму затоа сметам дека ниту еден меѓудржавен договор не смеe да бидe на штета на сопствените државни и национални интереси. Постојано ја нагласувам потребата од решавање на спорните прашања на мирен начин и преку искрен и отворен политички дијалог, во согласност со меѓународното право и добрососедските односи со цел да се постигнат праведни и фер решенија врз основа на принципите на заемно почитување и поддршка и воздржување од мешање во внатрешните работи на државите“, порача македонскиот претседател.
На средбата, претседателот Иванов ја реафирмирал целосната посветеност на земјата на европската и евроатлантската интеграција и истакна дека Република Македонија очекува отворена поддршка од Република Бугарија за почеток на пристапни преговори за членство во ЕУ, како и поддршка во однос на приемот на Република Македонија во НАТО.
Меѓудругото, претседателот Иванов изрази очекување за интензивирање на политичкиот дијалог меѓу двете земји и скора средба со бугарскиот претседател, Румен Радев, посочувајќи дека посетите на највисоко ниво, претставуваат дополнителен импулс во градењето на меѓусебната доверба и добрососедските односи, информираат од кабинетот на македонскиот претседател.
Во контекст на потребата од засилена регионална соработка, претседателот Иванов и премиерот Борисов разговарале за предизвиците кои произлегуваат од мигрантската криза и нејзиниот безбедносен аспект, при што македонскиот претседател ја истакнал потребата за натамошно продлабочување и интензивирање на соработката меѓу разузнавачките служби, меѓуармиската соработка и соработката во борбата против организираниот криминал и тероризмот.
Исто така, двајцата соговорници изразиле подготвеност за натамошно унапредување на севкупните билатерални односи меѓу двете земји, особено истакнувајќи ја потребата за подобрување на економската соработка и реализирање на започнатите инфраструктурни проекти во регион, соопштија од претседателскиот кабинет.
Потсетуваме, премиерите на Република Македонија и на Република Бугарија, Зоран Заев и Бојко Борисов, денеска во Скопје потпишаа договор за пријателство, добрососедство и соработка. Премиерите на двете земји, на заедничката прес-конференција изјавија дека потпишувањето на договорот е пример за добрососедство меѓу двете земји, и покажува дека земјите од регионот имаат европско лидерство.
