Претседателот Иванов во работна посета на Азербејџан

СКОПЈЕ (АА) - Претседателот на Република Македонија, Ѓорге Иванов, денеска и утре престојува во работна посета на Баку, Република Азербејџан, по повод учеството на 5. Глобален Баку форум, во организација на меѓународниот центар „Низами Ганџави“, пренесува Anadolu Agency (AA).

Од кабинетот на претседателот Иванов, соопштуват дека тој ќе се обрати на претседателската сесија на форумот на тема „Иднината на меѓународните односи: моќ и интереси“.

Како што соопштуваат за време на работната посета, предвидено е претседателот Иванов да оствари билатерална средба со претседателот на Република Азербејџан, Илхам Алијев, како и повеќе билатерални средби со учесниците на форумот.

На глобалниот форум ќе учествуваат над 100 актуелни и поранешни претседатели, премиери и министри, дипломати, голем број истакнати личности од општествениот и политичкиот живот, универзитетски професори, како и претставници на Програмата за млади лидери на Глобалниот форум.

Меѓу останатите теми на дискусија на овогодинешнот форум се: иднината на Европа, улогата на Кина во меѓународните односи, односите меѓу Русија и Западот, предизвиците во справување со модерниот тероризам, дали екстремизмот и популизмот се најголема закана за безбедноста, иднината на трансатлантските односи, Алијанса меѓу западот и муслиманските држави.