Vesna Besic
04 Јули 2022•Ажурирај: 05 Јули 2022
СРЕБРЕНИЦА (АА) - На гробиштата на Меморијалниот центар Сребреница - Поточари денеска започна копањето на гробовите во кои ќе бидат погребани посмртните останки на 50 новоидентификувани жртви на геноцидот во Сребреница, а кои ќе бидат погребани на колективен погреб на 11 јули годинава, јавува Агенција Анадолија (АА).
Кенан Каравдиќ, помошник-директор на ЈКП „Градски гробишта“ Високо, денеска беше на гробиштата во Меморијалниот центар каде што започна копањето на гробовите за жртвите од геноцидот извршен летото 1995 година на подрачјето на Сребреница.
„Од 2003 година ова јавно претпријатие се занимава со организација на закопување и погреб на жртвите од геноцидот. Денеска почнавме да копаме гробови. На гробиштата на Меморијалниот центар има резервации за исчезнатите. Се трудиме да ги задоволиме семејствата, доколку сè уште не е пронајден брат, татко, да оставиме место. Оваа година ќе има 50 гробови“, рече Каравдиќ.
Годинава беше променет датумот на поаѓање на ковчезите со посмртните останки на жртвите од Високо.
„Организацискиот одбор одлучи годинава тоа да биде на 8 јули“, додаде Каравдиќ.
Оваа година на гробиштата на Меморијалниот центар Сребреница - Поточари ќе бидат погребани 50 жртви на геноцидот извршен врз Бошњаците во Сребреница во 1995 година.
Најстарата жртва чии останки ќе бидат погребани годинава на гробиштата на Меморијалниот центар во Поточари е Хусејин Крџиќ, роден 1936 година.
Меѓу жртвите кои годинава ќе бидат погребани има и тројца малолетници.
Станува збор за момчиња кои имале само 16 и 17 години кога биле убиени. Ќе бидат погребани и близнаците Самир и Семир Хасановиќ кои во моментот на смртта имале само 20 години. Нивните останки беа пронајдени во различни масовни гробници. Конечен мир ќе најдат и таткото и синот - Хајдин и Сеад Хукиќ. Ова е третиот син на Хајдин кој исчезна. Два сина се погребани претходно, а по еден сè уште се трага.
Во проектот за идентификација на Подриње има посмртни останки на уште 31 жртва кои се официјално идентификувани преку методот на ДНК и од нивните семејства, но сè уште нема согласност за погребување на овие жртви.
Исто така, преку ДНК-методот се идентификувани уште 61 жртва, но семејствата не пристапиле кон официјална идентификација.
Ден по колективниот погреб, во Меморијалниот центар ќе започнат процесите на реексхумација, а посмртните останки на 85 жртви ќе бидат повторно ексхумирани со цел на нивните претходно закопани тела да се додадат делови од скелетот кои подоцна беа пронајдени и идентификувани.
