Gorana Jakovljevic
11 Октомври 2024•Ажурирај: 12 Октомври 2024
БЕЛГРАД (АА) - Претседателите на Туркије и Србија, Реџеп Таип Ердоган и Александар Вучиќ, денес присуствуваа на Бизнис форумот Србија-Туркије во српската престолнина Белград, на чие отворање Вучиќ рече дека Туркије денес е една од најмодерните и најуспешните земји, јавува Анадолу.
Вучиќ во своето обраќање на Бизнис форумот рече дека ова е продолжение на успешната и многу интензивна економска соработка меѓу двете земји во изминатиот период. Истакна дека пругата Нови Сад - Суботица ќе биде отворена за месец дена, и дека ќе биде поврзана со Будимпешта со брзата железница кога Унгарците ќе завршат со работа за помалку од две години. Посочи дека истовремено е почната и изградбата на брзата пруга Белград - Ниш, како и дека веќе се гради пругата Ниш - Димитровград со што ќе се олесни транзитот меѓу Србија и Туркије. Како што рече Вучиќ, воведени се нови авиолинии, а други допрва ќе се воведат.
Тој потсети на Туркије пред 40 години, наведувајќи дека таа денес не е истата земја.
„И Реџеп Таип Ердоган и сите вие заедно го сменивме ликот на таа земја. Денес Туркије е една од најмодерните и најуспешните земји“, рече Вучиќ.
Тој истакна дека доаѓањето на турските инвеститори е од исклучително значење за Србија да напредува со иста брзина.
„За нас соработката со Туркије е и повеќе од економија, нешто што значи стабилност и мир на целиот Балкан. Нешто што за нас е од клучно значење. Не се срамиме да го кажеме ова. Видовме дека сами со сопствен труд и работа и во соработка со нашите пријатели можеме да ја подигнеме нашата земја“, рече српскиот претседател.
Тој изјави дека претседателот на Туркије ветил дека ќе има одлична соработка во наменската индустрија, како и дека ќе има значително турско присуство на ЕКСПО 2027 во Србија.
Нагласи дека имаат многу работа до 1 декември 2026 година, кога треба да ги предадат клучевите од ЕКСПО.
„За две години мораме сѐ да завршиме. А тоа се најголемите инфраструктурни и секакви други работи во историјата на оваа земја. А голем дел од турските компании ќе ни помогнат во таа работа. И ние сме среќни поради тоа. Среќни сме и поради експедитивноста, сериозноста и одговорноста на турските компании, но и поради она што ќе го доставиме на генерациите што доаѓаат во нашата земја“, додаде Вучиќ.
На форумот се собраа претставници на околу 300 компании од двете земји.
Претседателот на Туркије, Ердоган денеска во Белград се сретна со Вучиќ, а потоа присуствуваа на четвртиот состанок на Советот за соработка на високо ниво меѓу Туркије и Србија, по што претставниците на двете земји потпишаа договори за соработка.
Потпишани се вкупно 11 договори и документи за зајакнување на билатералните односи и соработка, кои ги опфаќаат областите како енергетиката, трговијата, технологијата, спортот, социјалната сигурност, управувањето со катастрофи и медиумите.
