Во Гостивар се одржа комеморативна програма за Палестина

ГОСТИВАР (АА) - Во организација на Здружението „Генч Калемлер“, во селото Долна Бањица во Гостивар се одржа верско-културна програма за Палестина и Палестинците, јавува Анадолу.

Активноста беше организирана пред петочната молитва, за комеморација на шехидите од Газа, а учествуваа и гости од Туркије, имамите на џамијата Бештепе во Анкара, Тајиб Хош и Али Бурак Балдокен.

На комеморативната програма учествуваа и гостиварскиот муфтија Сабахудин Зендели, како и делегација од Гостиварското муфтиство.

Во изјава за Анадолу, муфтијата Зендели изјави дека им е чест да ги пречекаат двајцата специјални гости од Туркије.

„Ја изразувам мојата срдечна благодарност до муфтијата на Исламската верска заедница, но исто така ја користам приликата да ги изразам нашите срдечни честитки и благодарност до Реис-ул Улема Шаќир Фетаху што тука се овие две личности кои секогаш се покрај нашиот претседател Реџеп Таип Ердоган и ги пренесуваат неговата порака и поздрав до верниците и до браќата муслимани од територијата на Гостивар“, рече тој.

Претседателот на Здружението „Генч Калемлер“, Бејтула Јусуф, од своја страна, рече дека во Палестина речиси една година се случува масакар, во кој животот го загубија повеќе од 40.000 луѓе, меѓу кои и жени и деца.

Истакнувајќи дека во овој период над 80.000 луѓе се повредени, а 2 милиони луѓе се раселени од своите места, Јусуф рече: „Поради оваа причина, за да покажеме дека сме на нивна страна, денеска организиравме програма пред петочната молитва, а вечерва имаме и состанок на кој ќе се упатат молитви за Палестина.“

Пред петочната молитва, имамите од Туркије рецитираа делови од Куранот и беше извршена молитва за загинатите во светот, особено во Газа.