Во Албанија пристигнаа 121 Авганистанец евакуирани од Авганистан

ТИРАНА (АА) - Во Албанија пристигнаа 121 Авганистанец кои беа евакуирани од Авганистан, пренесува Агенција Анадолија (АА).

Информацијата преку писмено соопштение ја потврди Министерството за Европа и надворешни работи на Албанија.

Во соопштението се наведува дека 121 Авганистанец, меѓу кои и 11 бебиња, пристигнале на Аеродромот „Мајка Тереза“ во Тирана.

Авганистанците кои привремено ќе престојуваат во Албанија, на аеродромот беа пречекани од страна на албанската министерка за Европа и надворешни работи, Олта Џачка, амбасадорката на САД во Тирана, Јури Ким, претставници на Вооружените сили на Албанија, како и претставници на други институции.

Министерката Џачка нагласи дека Албанците покажале солидарност, гостопримство и великодушност, додавајќи дека ова е емотивен момент за нив.

Таа рече дека нејзината земја прифатила привремено да засолни околу 4.000 Авганистанци, и дека во меѓувреме продолжуваат процедурите за нивно мигрирање во САД.

Евакуираните Авганистанци, откако ќе ги поминат здравствените контроли, ќе бидат сместени во Драч.