Владата на Северна Македонија го прифати францускиот предлог

СКОПЈЕ (АА) - Премиерот на Република Северна Македонија, Димитар Ковачевски, по одржаната денешна седница на Владата соопшти дека биле усвоени заклучоците од Собранието и дека се донела одлука за одобрување на предлогот на француското претседателство од 30 јуни со кој треба да се откочат евроинтеграциите на земјата, јавува Агенција Анадолија (АА).

„Донесовме одлука за одобрување на предлогот на француското претседателство од 30 јуни 2022 година. Со оваа одлука го започнуваме процесот на пристапни преговори на Северна Македонија со Европската Унија. Со оваа владина седница заокружуваме уште еден објективно историски чекор за нашата земја“, рече Ковачевски.

Процес што ќе резултира со остварување на втората стратешка цел на земјата, полноправно членство во ЕУ.

„Ние денес имаме преговарачка рамка во која македонскиот јазик и идентитет се заштитени, историските прашања се надвор од истата, а ние сме на чекор од одржување на првата меѓувладина седница која ќе го означи почетокот на преговорите со Европската Унија“, рече Ковачевски истакнувајќи дека денес се отвораат нови перспективи на државата.

Додаде дека следните денови ќе се пристапи кон реализација и преговори со ЕУ, конечно по 17 години.

„Конечно денес ја имам честа да го најавам датумот за првата меѓувладина конференција која треба да се одржи веќе наредната недела на 19 јули во Брисел. Потоа Европа ќе биде во Скопје, а Република Северна Македонија во Брисел“, истакна Ковачевски.

Претходно денеска, Собранието на Северна Македонија со 68 гласови „за“, а ниту еден „против“ и ниту еден воздржан, ги изгласа заклучоците со кои се задолжува Владата да го продолжи процесот со Европската Унија (ЕУ) и да ја усвои преговарачката рамка за пристапните преговори со ЕУ предложена од страна на претседателството на Франција со Советот на ЕУ.

Пратениците од опозицијата предводени од ВМРО-ДПМНЕ по завршувањето на дебатата во Собранието ја напуштија собраниската сала и не гласаа за заклучоците.

Во меѓувреме, додека се дискутираше во Собранието, група граѓани протестираа пред Собранието против францускиот предлог со паролата „Ултиматум, не благодарам“.

Откако беа изгласани заклучоците во Собранието, прес-конференција одржа лидерот на опозициската ВМРО-ДПМНЕ, Христијан Мицкоски. Тој истакна дека во „протоколот изречно се содржат барањата за бугаризација“, како и дека „сега бугарските асимилаторски барања за промена на учебниците, за преиначување на историјата стануваат услов за влез во ЕУ и додека тие не се исполнат нема почеток на преговори“.

Според него, иако заклучоците се изгласани во Собранието, „сѐ уште ништо не е готово“.

„Информацијата која помина во Собранието нема никакво значење затоа што рамката ја усвојува Владата, но затоа обврските кои произлегуваат од преговарачката рамка, а тоа е промена на Уставот со цел внесување на Бугарите во него, нема да помине во македонското Собрание. За тоа гаранција е ВМРО-ДПМНЕ и коалицијата“, изјави Мицкоски и порача:

„Уставот нема да се смени, преговарачката рамка нема да биде прифатена.“

Информација за содржината на нацрт-преговарачката рамка за пристапните преговори на Северна Македонија со ЕУ беше предложена од француското претседателство со Советот на ЕУ на 30 јуни оваа година, по што следуваше процес на консултации помеѓу политичките партии во врска со францускиот предлог. Истовремено, во изминатите денови се одржуваа и протести на граѓаните кои се спротивставија на прифаќањето на францускиот предлог.

​​​​​​​Почетокот на преговорите на ЕУ со Македонија е блокиран со бугарското вето од ноември 2020 година поради спор околу јазикот и историјата. Една година претходно, европскиот пат на двете земји, Северна Македонија и Албанија, беше блокиран од Франција, која бараше промена на методологијата за пристапните преговори со ЕУ.