26 Октомври 2019•Ажурирај: 28 Октомври 2019
Според последните официјални статистички податоци, највисоки просечни плати во регионот се забележани во Словенија и Хрватска, а најниските во Северна Македонија, Србија и Босна и Херцеговина, јавува Anadolu Agency (AA).
Според последните достапни податоци на словенечкиот Завод за статистика, просечната нето-плата во таа земја изнесува 1.114 евра. Во исто време, тоа е единствената плата во земјите од регионот која ја надминува „магичната вредност“ од 1.000 евра.
Просечната плата во Словенија е двојно поголема од просечните примања во речиси сите земји од балканскиот регион, исклучувајќи ја Хрватска во која просечните месечни примања се приближуваат кон вредноста од 900 евра.
По Словенија следува токму Хрватска, уште една членка на Европската Унија (ЕУ) од балканскиот регион, во која, како што покажуваат официјалните податоци на Државниот завод за статистика за месец август, просечната плата изнесувала 6.438 куни, односно 864 евра.
Следува Црна Гора, каде што според официјалните податоци на Заводот за статистика на Црна Гора - Монстрата, просечната заработувачка без данок во август 2019 година изнесувала 517 евра.
Најниски просечни плати во регионот се забележани во Северна Македонија, Србија и Босна и Херцеговина.
Според податоците на Агенцијата за статистика на БиХ, просечната исплатена месечна нето-плата во БиХ во август оваа година изнесувала 925 КМ (конвертибилни марки) односно 472 евра, што е нешто поголема плата од соседна Србија.
Според податоците на Републичкиот завод за статистика на Србија, просечната плата во Србија во август оваа година изнесуваше 54.115 динари или 460 евра.
И на самиот крај, најновите статистички податоци на Заводот за статистика на Северна Македонија покажуваат дека просечната плата во јуни изнесувала 25.127 денари, односно 409 евра, што е убедливо најниската месечна заработувачка во регионот.
