Албанија: Продолжува броењето на гласовите од парламентарните избори

ТИРАНА (АА) - Централната изборна комисија (ЦИК) на Албанија ги објави првичните резултати според досега избројаните 50,48 отсто од гласовите на парламентарните избори во Албанија коишто се одржаа вчера, јавува Anadolu Agency (AA).

Според првичните информации објавени од страна на ЦИК, од избројаните 50,48 отсто од гласовите, односно 2.707 избирачки центри од вкупно 5.362, Социјалистичката партија на Албанија (ПС), предводена од премиерот Еди Рама, кој истовремено е кандидат за премиер на оваа партија, е во предност со 48,93 отсто од гласовите.

Според овие информации, Демократската партија на Албанија (ПД), предводена од страна на Љуљзим Баша, кој истовремено е кандидат за премиер, освои 28,65 отсто од гласовите, додека партијата Социјалистичко движење за интеграција (ЛСИ), чиј кандидат за премиер е Петрит Васили, истовремено и лидер на оваа партија, освои 14,67 отсто од гласовите. Партијата за правда, интеграција и унија (ПДИУ), предводена од страна на Шпетим Идризи, освои 4,41 отсто од гласовите.

Според соопштеното, процесот на пребројување на гласовите низ целата земја ќе продолжи во текот на денешниот ден.

Првичните информации објавени од страна на ЦИК велат дека излезноста на овие избори е 46,62 проценти.

Потсетуваме, вчера во Албанија се одржаа парламентарните избори на коишто учествуваа 18 политички партии.

Секој граѓанин со право на глас можеше да гласа во вкупно 5.362 избирачки центри низ цела Албанија. Парламентарните избори беа набљудувани од страна на 5.351 набљудувач, од кои 896 од меѓународните мисии за набљудување.