„Србија провоцира со воени вежби во близина на границата со Косово“, изјави косовскиот премиер Курти

ПРИШТИНА (АА) - Премиерот на Косово, Албин Курти, го обвини официјален Белград дека намерно провоцира со вежбите на Војската на Србија во близина на границата со Косово, пренесува Анадолу.

Курти доцна синоќа на социјалната мрежа Фејсбук објави видео на кое се гледа движење на специјализирана единица на Војската на Србија покрај косовската граница.

„На само неколку метри од границата со Косово, кај селото Бање во Зубин Поток, во текот на денот забележани се специјализирани единици на Војската на Србија. Слично движење е забележано и во селото Осларе во Бујановац, во близина на границата со Косово“, напиша Курти.

Премиерот на Косово потсети дека претседателот на Србија, Александар Вучиќ, пред неколку дена јавно му се заканил на Косово изјавувајќи дека „Србија ќе го почека вистинскиот можен момент и ќе ја искористам можноста да дејствувам“.

„Свесни сме дека Војската на Србија изведува редовни вежби и дека ги користи како изговор за намерни провокации во близина на границата со Косово. Внимателно следиме дали ќе се обидат да ја минат границата бидејќи не е нормален ваков пристап на нивните воени возила“, нагласи Курти во објавата на Фејсбук.