Министерот за надворешни работи на Црна Гора, Срѓан Дармановиќ, по состанокот со турскиот министер за надворешни работи, Мевлут Чавушоглу, изјави дека турските инвеститори се многу ценети во Црна Гора и дека посакуваат уште повеќе турски инвестиции, јавува Anadolu Agency (AA).

„Веројатно е дека инвеститорите во своето работење во секоја земја можат да наидат на потешкотии, но фактот дека во Црна Гора сѐ повеќе има инвеститори, и турски граѓани и мали фирми, како и доста заинтересирани нови инвеститори, од кои некои се меѓународни познати фирми, сведочи за тоа како турските инвеститори ја доживуваат Црна Гора и како ние ја доживуваме Турција. Сигурен сум дека соработката може да биде само подобра“, рече Дармановиќ.

Црна Гора, како што рече, е поборник на мирот и стабилноста.

„Членка сме на НАТО и отидовме најдалеку во преговорите за членство во ЕУ. Имаме одлични односи со сите соседи и како такви секогаш сме спремни да помогнеме во решавање на проблемите во регионот. Во регионот беа останати три големи проблеми, еден е името на Северна Македонија, кој беше помеѓу таа земја и Грција. Тој проблем е успешно решен со храброста, визијата и упорноста на двете влади да изнајдат решение. Како последица на тоа решение, Северна Македонија е на пат кон НАТО и ЕУ. Вториот проблем се однесува на разговорите на Белград и Приштина кои треба да најдат долгорочно решение. Ние сме пријатели со двете земји и ги поддржуваме да најдат решение“, појасни црногорскиот министер.

Третиот проблем е, според неговите зборови, „дисфункционалноста на Босна и Херцеговина“.

„Мислам дека најдобро решение за БиХ е да го продолжи патот кон НАТО и ЕУ, колку и за тоа да треба време“, рече тој.

Дармановиќ смета дека „ЕУ мора да знае што сака од Западен Балкан“.

„Одлучната политика на проширување на Западен Балкан е единствено решение и за нас и за ЕУ. Сите наши земји од регионот сакаат да ѝ припаѓаат на оваа заедница. Затоа се потребни и нашите напори и напорите на ЕУ. Веруваме дека охрабрувачки чекор би бил во октомври и Северна Македонија и Албанија да добијат зелено светло за почеток на преговорите, а Црна Гора и Србија да продолжат со отворање и затворање на поглавјата“, рече Дармановиќ.

Тој смета дека од земјите од регионот, прва членка на ЕУ ќе стане токму Црна Гора која го поддржува европскиот пат на своите соседи.