ИСТАНБУЛ (АА) - Претседателката на Европската комисија, Урсула фон дер Лајен, денес соопшти дека ќе предложи пакет мерки против Израел, со паузирање на билатералната поддршка, делумно суспендирање на Договорот за асоцијација и санкционирање на министри од крајната десница, јавува Анадолу.

„Ќе предложам пакет мерки за да се изнајде пат напред. Прво, Комисијата ќе направи сè што може сама. Ќе ја паузираме нашата билатерална поддршка за Израел. Ќе ги запреме сите плаќања во овие области без тоа да влијае врз нашата работа со израелското граѓанско општество“, истакна Фон дер Лајен за време на нејзиниот говор за состојбата на Унијата.

Таа, исто така, вети дека ќе предложи санкции за израелските министри од крајната десница и насилните доселеници, а наедно предложи и делумно суспендирање на Договорот за асоцијација за прашања поврзани со трговијата.

„Следниот месец ќе формираме донаторска група за Палестина, вклучително и наменски инструмент за обнова на Газа. Ова ќе биде меѓународен напор со регионални партнери и ќе се темели врз импулсот од конференцијата во Њујорк организирана од Франција и Саудиска Арабија“, додаде Фон дер Лајен.

Понатаму таа повика на ослободување на заложниците, неограничен пристап до целата хуманитарна помош и итен прекин на огнот, нагласувајќи дека на долг рок единствен реалистичен пат кон мирот е дводржавно решение, според кое двете страни ќе живеат една покрај друга во безбедност.

„Она што се случува во Газа ја потресе совеста на светот. Луѓе убивани додека молат за храна, мајки што држат тела на безживотни бебиња. Овие слики се едноставно катастрофални... Човечки предизвиканиот глад никогаш не може да биде оружје на војна, заради децата, заради човештвото, ова мора да престане“, рече Фон дер Лајен.