ИСТАНБУЛ (АА) - Американскиот државен секретар Марко Рубио и ирачкиот премиер Мухамед Шиа ал-Судани остварија телефонски разговор за пренесување на терористите во безбедни објекти во Ирак, јавува Анадолу.

„Државниот секретар ја пофали иницијативата и лидерството на Владата на Ирак во забрзувањето на трансферот и притворањето на терористите на ДЕАШ во безбедни објекти во Ирак, по неодамнешната нестабилност во Североисточна Сирија. Секретарот и премиерот разговараа за тековните дипломатски напори за да се обезбеди дека земјите брзо ќе ги репатрираат своите граѓани во Ирак, носејќи ги пред лицето на правдата“, се вели во соопштението на американскиот Стејт департмент.

Се наведува дека двајцата зборувале и за „тековните разговори“ во Ирак за формирање влада, нагласувајќи ја „заедничката посветеност“ за обезбедување земјата да може да го реализира својот потенцијал „како сила за стабилност, просперитет и безбедност на Блискиот Исток“.

„Државниот секретар нагласи дека Влада контролирана од Иран не може успешно да ги стави сопствените, интересите на Ирак, на прво место, да го држи Ирак подалеку од регионалните конфликти или да го унапреди заемно корисното партнерство меѓу САД и Ирак“, се додава во соопштението.

Централната команда на САД (CENTCOM) во средата соопшти дека започнала мисија за пренесување притвореници на ДЕАШ од Североисточна Сирија во Ирак за да се осигури дека припадниците на терористичката организација ќе останат во обезбедени притворни центри.

Мисијата започна со транспорт на 150 припадници на ДЕАШ од притворен центар во североисточната покраина Хасека до безбедна локација во Ирак, со планови до 7.000 притвореници да бидат пренесени во објекти контролирани од Ирак.