ИСТАНБУЛ (АА) - Јужна Кореја ги предупреди своите државјани да го напуштат Иран во услови на зголемените тензии и стравувањата од можен воен удар на САД, се наведува во соопштение на Амбасадата и во извештаи на локалните медиуми објавени денес, јавува Анадолу.

Во известувањето објавено вчера на својата веб-страница, Амбасадата на Јужна Кореја во Иран предупреди дека безбедносната состојба во земјата може нагло да се влоши.

Граѓаните се повикани внимателно да ги следат медиумските извештаи и известувањата од Амбасадата, како и да преземат дополнителни мерки за лична безбедност, пренесе „Кореја хјералд“.

„Последните медиумски извештаи укажуваат на брзо ескалирање на регионалните тензии, повикувајќи се на можноста за американски напад врз Иран и предупредувањето на Техеран за одмазда“, соопшти Амбасадата.

Амбасадата ги советуваше јужнокорејските државјани кои моментално се во Иран да ја напуштат земјата „што е можно побрзо“, освен ако нивниот престој не е неопходен.

Исто така, ги повика оние што планираат патување во Иран да ги откажат или одложат своите патувања.

Предупредувањето доаѓа во време кога САД го зголемуваат своето воено присуство на Блискиот Исток. Носачот на авиони „УСС Абрахам Линколн“ и дополнителни борбени авиони веќе пристигнаа во регионот, додека „УСС Џералд Р. Форд“, според извештаите, е на пат.

Американскиот претседател Доналд Трамп минатиот четврток постави рок од 10 до 15 дена за преговорите со Иран да дадат резултат пред да се разгледаат воени опции.

Тој во петокот ги повтори заканите, додавајќи дека размислува и за поограничен напад со цел да изврши притисок врз Иран за постигнување „сериозен“ договор.

Двете страни треба да одржат нов круг нуклеарни преговори во Женева, Швајцарија, в четврток, потврди вчера министерот за надворешни работи на Оман.