ГАЗА / ИСТАНБУЛ (АА) – Четворица Палестинци се повредени денес во израелско артилериско гранатирање на градот Газа, што е најновото кршење на договорот за прекин на огнот, соопштија медицински извори.

Четворицата Палестинци се итно префрлени во Баптистичката болница Ал-Ахли во централна Газа откако израелските сили гранатираа училиште претворено во засолниште во населбата Ал-Туфа во градот Газа.

Местото на нападот е подрачје меѓу локациите од кои израелската Армија се повлече согласно со договорот за прекин на огнот, кој е во сила во Појасот Газа од 10 октомври.

Палестинците го обвинуваат Израел за постојано кршење на договорот за прекин на огнот со кој се запре двегодишната војна во која загинаа речиси 70.700 Палестинци, претежно жени и деца, и повредени се над 171.000 од октомври 2023 година.

Според палестинското Министерство за здравство, најмалку 395 Палестинци се убиени, а 1.088 ранети во израелските напади од прекинот на огнот.