ГРАД ГАЗА / ИСТАНБУЛ (АА) - Уште едно палестинско бебе го загуби животот во Појасот Газа поради силниот студ и поради големиот недостиг на засолништа, соопшти денес Министерството за здравство, јавува Анадолу.

Министерството објави дека двомесечното бебе Аркан Фирас Муслех починало како резултат на суровите временски услови, со што бројот на смртни случаи на мали деца од студ се искачи на три од почетокот на декември.

Според Цивилната одбрана на Газа, 25 лица, од кои шест деца, починале од студ и уривање на оштетените згради во Газа поради ниските температури во енклавата разурната од војна.

Портпаролот Махмуд Басал изјави дека 18 згради оштетени во претходните израелски напади целосно се урнале, а кај повеќе од 110 регистрирано е делумно уривање во сегашниот временски систем на низок притисок, загрозувајќи ги животите на илјадници раселени лица кои се засолнуваат во внатрешноста на овие згради за да се заштитат од студот.

Портпаролот додаде дека 90 % од шаторите во кои се засолнуваат раселените цивили биле однесени од силните ветрови или биле поплавени од обилните дождови низ Газа, при што илјадници семејства се останати без засолништа или облека што може да ги заштити од суровото време.

Тој повика на итно започнување на обновата на Газа и обезбедување мобилни домови што ќе ги заштитат животите и достоинството на Палестинците.

Израелската Армија уби повеќе од 71.200 Палестинци, претежно жени и деца, а повредени се над 171.200 од октомври 2023 година во Газа во бруталната офанзива што ја остави и енклавата во урнатини.

И покрај прекинот на огнот што стапи на сила во Газа на 10 октомври, Израел сè уште ги држи затворени премините на територијата и го спречува влезот на мобилни куќи и материјали за обнова, влошувајќи ја тешката состојба на речиси 2,4 милиони луѓе во енклавата.