АНКАРА (АА) - Американскиот претседател Доналд Трамп се состана со сирискиот претседател Ахмад ал Шара во главниот саудиски град Ријад, што претставува нивна прва средба, пренесува Анадолу.

Белата куќа и саудиските медиуми јавија за состанокот, но засега не се дадени детали за неговата содржина.

Официјален претставник на Белата куќа претходно изјави дека Трамп се согласил да се состане со Ал Шара за време на неговата посета на Саудиска Арабија денес.

Трамп вчера за време на инвестицискиот форум Саудиска Арабија - САД 2025 во Ријад изјави дека ќе нареди укинување на „бруталните и осакатувачки“ американски санкции врз Сирија за да ѝ се даде на таа земја „шанса за величенственост“.

Трамп пристигна во Саудиска Арабија вчера, започнувајќи ја турнејата низ Персискиот Залив, која ќе вклучува посети на Катар и Обединетите Арапски Емирати.