ИСТАНБУЛ (АА) - Американскиот претседател Доналд Трамп денес изјави дека Соединетите Американски Држави (САД) и Венецуела „добро соработуваат“ за обновата на нафтената и гасната инфраструктура на јужноамериканската земја, при што се очекува нафтените компании да инвестираат најмалку 100 милијарди долари, пренесува Анадолу.

Во објавата на неговата платформа за социјални медиуми Трут Соушал, Трамп рече дека Венецуела ослободила „голем број политички затвореници“, опишувајќи го потегот како знак дека земјата „бара мир“, нарекувајќи го „многу важен и паметен гест“.

„САД и Венецуела добро соработуваат, особено кога станува збор за обновата, во многу поголема, подобра и помодерна форма, на нејзината нафтена и гасна инфраструктура“, рече Трамп.

Тој додаде дека поради оваа соработка го откажал претходно очекуваниот втор бран напади врз Венецуела. Сепак, рече дека „сите бродови ќе останат на место од безбедносни и сигурносни причини“.

Трамп рече дека се очекува нафтените компании да инвестираат најмалку 100 милијарди долари во напорите за обнова и дека денес во Белата куќа ќе се сретне со високи челници за да разговараат за плановите.

САД спроведоа воена операција во Венецуела на 3 јануари, приведувајќи ги претседателот Николас Мадуро и неговата сопруга Силија Флорес. Подоцна Трамп изјави дека за време на преодниот период неговата администрација ќе „управува“ со Венецуела и нејзината нафтена инфраструктиура.