ДАМАСК / ИСТАНБУЛ (АА) - Сирискиот претседател Ахмад ал-Шара денес пристигна во Париз во своја прва официјална посета на европска земја откако ја презеде функцијата, објави државната новинска агенција САНА, пренесува Анадолу.

Посетата се реализира на покана на францускиот претседател Емануел Макрон.

Ал-Шара треба да одржи разговори со Макрон фокусирани на обновата на Сирија и повторните израелски напади врз сириска територија, соопшти новинската агенција, цитирајќи извор од Министерството за информации.

Се очекува во разговорите да им се даде приоритет на економскиот развој и обновата, со посебен фокус на енергетскиот и авијацискиот сектор, објави САНА, додавајќи дека дел од агендата е и регионалната дипломатија, особено односите со соседен Либан.

Изворот го нагласи значењето на посетата на Ал-Шара, опишувајќи ја како значаен момент во надворешните односи на Сирија. Ова е негова прва европска посета по падот на поранешниот режим предводен од Башар ал-Асад во декември.

Елисејската палата вчера потврди дека Ал-Шара ќе пристигне во Париз. Се очекува Макрон да го прими и да изрази поддршка за изградба на „нова, слободна и стабилна Сирија што ги почитува сите компоненти на својот народ“.