ИСТАНБУЛ (АА) - Москва и Киев денес меѓусебно се обвинуваа за ноќни воздушни напади, додека се очекува американскиот претседател Доналд Трамп да му биде домаќин на украинскиот претседател Владимир Зеленски во Флорида на разговори за мировен план од 20 точки за ставање крај на војната меѓу Русија и Украина, известува Анадолу.

Руското Министерство за одбрана во објава на платформата Телеграм наведе дека воздушната одбрана соборила 25 украински дронови, од кои 12 биле соборени над регионот Самара, кој граничи со Казахстан.

Артем Коренјако, портпарол на руската Федерална агенција за воздушен транспорт, изјави дека во текот на ноќта на меѓународниот аеродром Самара биле воведени привремени ограничувања за слетување и полетување на авиони. Подоцна ограничувањата биле укинати.

Локалните власти во регионот Самара, како и во другите региони наведени во соопштението на руското министерство, вклучувајќи ги регионите Белгород, Курск, Саратов, Волгоград и Ростов, не пријавиле жртви или оштетувања на инфраструктурата.

Руската државна новинска агенција РИА објави дека повеќе од 300 летови биле одложени или откажани на московските аеродроми Внуково и Шереметјево.

Од своја страна, украинските воздухопловни сили на платформата Телеграм објавија дека воздушната одбрана соборила 30 од 48-те дронови од различни типови лансирани од Русија.

Украинската државна служба за вонредни состојби соопшти дека избувнал пожар во станбена зграда во јужниот град Одеса и предизвикани се оштетувања на зградата во нападот во текот на ноќта, но дека немало смртни случаи или повредени.

Олех Кипер, гувернерот на регионот Одеса, изјави дека пожарот е предизвикан од дрон кој удрил во покривот на двокатна станбена зграда.

„Информациите за жртвите се разјаснуваат. Надлежните служби работат на теренот“, информираше Кипер.

Меѓусебните обвинувања доаѓаат во време пред состанокот меѓу Трамп и Зеленски, кои треба да се сретнат во текот на денешниот ден во резиденцијата на Трамп, Мар-а-Лаго во Палм Бич, Флорида, каде ќе разговараат за мировниот план предложен од САД за речиси четиригодишниот конфликт, како и за безбедносните гаранции, објави украинската државна новинска агенција Укринформ.

Украинскиот претседател пристигна во Соединетите Американски Држави во саботата по посетата на соседна Канада, каде што е објавен нов пакет економска помош од 1,8 милијарди долари за Киев.

Во интервју за „Аксиос“ објавено во петокот, Зеленски изјави дека е подготвен да го стави целиот мировен план од 20 точки на национален референдум доколку конечниот предлог вклучува „многу тешка“ одлука за територијата, која претходно ја наведе како една од двете точки за кои нема договор со Соединетите Американски Држави, заедно со прашањето за управувањето со нуклеарната централа „Запорожје“.

Иако американската страна првично презентираше мировен план од 28 точки во ноември, последователните разговори доведоа до изготвување на ревидирана рамка од 20 точки.