ИСТАНБУЛ (АА) – Началникот на Генералштабот на француската армија, Фабиен Мандон, уште еднаш ги повтори своите предупредувања дека Европа треба да биде подготвена за можен „судир“ со Русија пред 2030 година во интервјуто за францускиот весник „Западна Франција“, јавува Анадолу.

„Знам дека Русија се реорганизира воено за да биде способна да влезе во борба против земјите на НАТО. Мора да се подготвиме за тоа“, рече Мандон.

Неговата изјава следуваше по говорот пред Комитетот за одбрана во октомври, кога нагласи дека француската војска мора да биде „подготвена за судир во рок од три до четири години“, што може да се појави во форма на хибриден конфликт или во многу понасилна форма, пренесува БФМТВ.

Мандон истакна дека неговата процена се заснова врз низа знаци и разузнавачки информации што, според него, се „широко споделени“ и од блиските сојузници – Германија, Велика Британија и САД.

Тој објасни дека француските вооружени сили редовно учествуваат во „големи вежби“ за подготовка во случај на конфликт и најави одржување на вежбата „Орион 2026“, во која ќе се вклучат војската, сојузничките држави и цивилното општество.

„За судир од ваков вид потребно е многу повеќе од само вооружените сили – потребна е поддршка од целата нација. Русија ги проучува нашите општества и знае дека нашата сила е во единството. Ако успее да нè подели, може да победи“, нагласи Мандон.

Генералот додаде дека „моралното повторно вооружување на нацијата“ е подеднакво важно како и военото, повикувајќи секој француски граѓанин да биде свесен и ангажиран во одбраната на земјата.