АТИНА (АА) - Двегодишно девојче загина, а уште осум лица се водат како исчезнати откако брод со 53 мигранти потона кај најјужниот италијански остров Лампедуза, објавија локалните медиуми, пренесува Анадолу.

Властите во Италија успеаја да спасат 45 луѓе, но двегодишното девојче почина на бродот што ги превезуваше на островот, според државната новинска агенција АНСА.

Две деца се меѓу исчезнатите лица, објави новинската агенција цитирајќи ги преживеаните.

Лампедуза беше во центарот на вниманието во последните месеци поради значителниот скок на бројот на чамци со мигранти што впловија таму.

Околу 1.087 луѓе пристигнаа во Лампедуза во понеделникот со чамци со мигранти, вклучително и брод со 576 луѓе од Египет, Сирија, Ирак, Мароко, Пакистан и Бангладеш.