ИСТАНБУЛ (АА) - Израел употреби приближно два експлозива со јачина на атомска бомба во своите напади врз блокираниот Појас Газа од 7 октомври, при што целосно уништи 35.000 станбени единици, пренесува Анадолу.

Канцеларијата за медиуми на Владата во Газа објави детали за 28-дневниот напад.

Наведено е дека израелската армија го нападнала Појасот Газа со 25 тони експлозив, што е еквивалентно на јачината на околу две атомски бомби.

Соопштено е и дека Израел извршил повеќе од 12.000 воздушни напади врз Појасот Газа од 7 октомври, а цел биле цивилни области, како што се домови, јавни институции, училишта и болници.

Тие истакнаа дека во израелските бомбардирања биле оштетени повеќе од 212.000 станбени единици, од кои 35.000 биле целосно уништени.

Уништени се и 85 државни објекти и други објекти, меѓу кои и Православниот културен центар.

Од Канцеларијата за медиуми е наведено дека израелската армија погодила 214 училишта, а 45 од нив не биле во функција поради нападот.

Тие ја објавија и информацијата дека во своите напади Израел убил 135 здравствени работници, 40 новинари, 18 службеници за цивилна заштита и 49 верски службеници.

Соопштено е и дека во израелските напади во Појасот Газа целосно се уништени 54 џамии, делумно се уништени 110 џамии, а оштетени се вкупно 164 џамии и три цркви.

Тие потсетија и дека индонезиската болница престанала да работи поради недостиг на гориво, а се испразнил и еден од генераторите на болницата Шифа, најголема медицинска установа во Газа, во која се сместени илјадници повредени луѓе и цивили.

„Окупаторските сили намерно гаѓаат пренаселени населени места, како што се бегалските кампови Џабалија, Ал Бурајџ и Ал Шати“, се вели во соопштението.

Соопштено е и дека Израел за 27 дена извршил 965 масакри, а загинале 9.061 лице, од кои 3.670 деца и 2.326 жени, 2.060 лица се водат како исчезнати, а околу 32.000 луѓе биле ранети.

Тие предупредија и за големиот број загинати под урнатините и за миризбата што се шири во околината. Исто така, предупредија дека тоа може да предизвика ширење на епидемични болести.

Израелската армија ги прошири воздушните и копнените напади врз Појасот Газа, во кој се извршуваат немилосрдни воздушни напади откако палестинската група Хамас започна ненадејна офанзива против Израел на 7 октомври.

Во израелските напади во Појасот Газа загинаа 9.061 Палестинец.

Израел објави дека повеќе од 1.400 Израелци, од кои 315 војници, загинале во нападите од Газа, а 5.132 лица се повредени.

Според Израел, бројот на загинати војници во судирите во Појасот Газа од 31 октомври се искачи на 23.

Од 7 октомври израелските сили и еврејските доселеници на Западниот Брег и Ал Кудс убија 138 Палестинци.

Гаѓајќи ја болницата Шифа, најголема медицинска установа во Газа со илјадници повредени и цивили, израелската армија ги погоди и баптистичката болница Ал Ахли и болницата за турско-палестинско пријателство, а ги бомбардираа и областа околу болницата Кудс и индонезиската болница.