ИСТАНБУЛ (АА) – Американскиот Конгрес се подготвува да ги укине санкциите од „Законот Цезар“ за Сирија, според документ во кој оваа одредба е вклучена во Законот за национална одбрана за фискалната 2026 година, јавува Анадолу.

Законодавството предвидува укинување на рестрикциите кои беа воведени за казнување на сега соборениот режим на Башар ал-Асад поради воени злосторства.

„Законот за заштита на цивилите во Сирија – Цезар од 2019 година… со ова се укинува,“ се наведува во нацрт-документот.

Предлог-законот треба да биде одобрен од Претставничкиот дом за да стане закон.

Сепак, укинувањето ќе биде условено со исполнување на повеќе критериуми.

Според документот, американскиот претседател мора да им доставува извештаи на неколку конгресни комитети – првично во рок од 90 дена, а потоа на секои 180 дена во период од четири години – потврдувајќи дека Сирија презема конкретни чекори за елиминација на ДЕАШ и други терористички организации, дека ги почитува правата на малцинствата, дека не презема воени активности против соседните држави, дека се бори против перењето пари и финансирањето тероризам, дека гони злосторства против човештвото извршени од поранешниот режим и презема мерки против производство на дрога.

Доколку претседателот утврди во два последователни извештајни периоди дека условите не се исполнуваат, санкциите може повторно да бидат воведени.

Документот содржи и дополнителни одредби поврзани со Сирија.

Според една од нив, американското Министерство за одбрана мора да достави извештаи до Конгресот за објектите за притвор на ДЕАШ во Сирија.

Дополнително, Министерството за одбрана, во координација со Централната команда на САД, е задолжено да обезбеди извештај за состојбата со условно консолидирање на американското воено присуство, базите и активностите во Сирија.

Законот „Цезар“, усвоен во 2019 година, воведе широки секундарни санкции кои им забрануваа на американски и странски субјекти да соработуваат со сириската влада или со активности за реконструкција, таргетирајќи ги злоупотребите на човековите права и употребата на хемиско оружје од страна на режимот на Асад.

Серија американски санкции веќе се укинати, вклучувајќи го и бришењето на високи сириски функционери од списокот на ОН и санкциите на САД поврзани со тероризмот. Укинувањето на преостанатите санкции бара акција од Конгресот, иако администрацијата може да ги откаже за периоди од 180 дена, како што направи во ноември.

Претседателот Доналд Трамп го започна процесот на укинување на американските санкции по средбата со сирискиот лидер Ахмад ал-Шараа во Саудиска Арабија во мај. По средбата, тој го најави укинувањето на санкциите и подоцна издаде извршна уредба за нивно официјално повлекување во јуни.

Американскиот Стејт департмент дополнително ја поддржа новата сириска влада со отповикување на терористичката ознака на Фронтот ал-Нусра, познат и како Хајат Тахрир аш-Шам, во јули, и со отстранување на Шара од листата на Специјално означени глобални терористи на 7 ноември.