ИСТАНБУЛ (АА) - Австралиска група за дигитално застапување денес поднесе тужба до Високиот суд против претстојната забрана за социјални медиуми во земјата за лица под 16 години, врз основа на тоа дека забраната „претставува кршење на правата на младите луѓе да останат поврзани и да имаат пристап до информации“, јавува Анадолу.

Собирањето податоци и документи за идентификација за проверка на возраста, исто така, „претставува голем ризик за безбедноста на личните информации на Австралијците на интернет“, соопшти Проектот за дигитална слобода на својата веб-страница.

Групата оценува дека забраната е „преголемо и непотребно ограничување“ што навлегува во „уставното право на слобода на политичка комуникација“, пренесе Австралиската радиодифузна корпорација.

Тужбата ја поднесуваат 15-годишните Ноа Џонс и Мејси Нејланд, кои се наведени како „репрезентативни“ членови на групата што ќе биде најмногу погодена од новите правила.

Во меѓувреме, министерката за комуникации Аника Велс денес изјави дека федералната Влада останува „цврста“ во намерите да ги спроведе законите.

„И покрај заканите и законските предизвици од луѓе со скриени мотиви, Владата на Албанезе останува на страната на родителите, а не на платформите“, рече Велс.

„Нема да бидеме заплашени од закани. Нема да бидеме заплашени од големата технолошка индустрија во име на австралиските родители. Стоиме цврсто“, додаде таа.

Од 10 декември платформите, како Редит, Кик, Фејсбук, Инстаграм, ТикТок, X, Снепчет, Тредс, Твич и Јутјуб, ќе се соочат со „прва ваква законска обврска во светот“ да спречат лица под 16 години да отвораат и да имаат профили на социјалните мрежи.

Австралискиот закон за социјални медиуми ги смета платформите за одговорни за спроведување на ограничувања според возраста, со казни до 32 милиони долари за непочитување, а корисниците и родителите не се соочуваат со казни.