ХАГ (АА) - Претседателот на Турција, Реџеп Таип Ердоган, се сретна со американскиот претседател Доналд Трамп, известува Анадолу.

Претседателите Ердоган и Трамп се сретнаа по ручекот што го приредија холандскиот крал Вилем-Александар и неговата сопруга во чест на лидерите и нивните сопруги кои присуствуваат на Самитот на шефовите на држави и влади на НАТО што се одржува во Хаг.

Средбата се одржа зад затворени врати во Кралската палата.

Според соопштението што го објави Дирекцијата за комуникации на Претседателството на Турција, за време на средбата биле разгледани билатералните односи меѓу Турција и САД, регионални и глобални прашања.

Претседателот Ердоган рекол дека двете земји имаат голем потенцијал во различни области, особено во енергетиката и инвестициите, и дека унапредувањето на соработката во одбранбената индустрија ќе го олесни постигнувањето на целта за вкупен обем на трговија од 100 милијарди долари.

Турскиот претседател го поздравил прекинот на огнот меѓу Израел и Иран постигнат благодарение на напорите на американскиот претседател Трамп и изразил надеж дека тој ќе биде траен. Тој ја нагласил и важноста на тесниот дијалог за што поскоро завршување на човечката трагедија во Газа и мирно решение на војната меѓу Русија и Украина.

Двајцата лидери, како водечки сојузници на НАТО, се осврнале и на важноста на чекорите што треба да се преземат за зајакнување на моќта на одвраќање на Алијансата.