СКОПЈЕ (АА) - Фонтаната Треви, еден од најпознатите симболи на италијанската престолнина, и оваа есен продолжува да привлекува милиони туристи што доаѓаат да ја видат нејзината величествена убавина и уметнички детали, јавува Анадолу.

Фонтаната, изградена според дизајнот на италијанскиот уметник Никола Салви и завршена во 1762 година, претставува едно од најзначајните дела на барокната архитектура во светот.

Со монументалната композиција и скулптури што го претставуваат богот на морето Нептун опкружен со митолошки суштества, фонтаната Треви останува вистинско ремек-дело на италијанската уметност.

Туристите што го посетуваат Рим ретко си заминуваат без да ја испочитуваат традицијата и да фрлат паричка во водата, верувајќи дека тоа ќе им донесе повторно враќање во „вечниот град“.

Со историјата, архитектонската грандиозност и романтичната атмосфера фонтаната Треви и понатаму останува една од најфотографираните атракции во светот, симбол на љубовта, желбите и бесмртната убавина на Рим.