Dzihat Aliju
09 Октомври 2025•Ажурирај: 10 Октомври 2025
КРИВОЛАК (АА) - На Криволак беа презентирани воена опрема и униформи набавени од Турција, јавува Анадолу.
Министерот за одбрана на Северна Македонија, Владо Мисајловски, началникот на Генералштабот, Сашко Лафчиски, амбасадорот на Турција во Македонија, Фатих Улусој, заменик-генералниот директор на „Аселсан“, Зекерија Шахин, директорот на канцеларијата на „Аселсан“ за Балканот, Доган Чошкун и други високи функционери присуствуваа на артилериското гаѓање со новите системи „Боран“ и на презентацијата на новата набавка на армиски униформи на армискиот полигон Криволак.
Во програмата беа претставени Системот за команда и контрола на огнена поддршка ADOP 300-T и Системите за контрола на артилерискиот оган ВОЛКАН 230/105, развиени од „Аселсан“.
Во својата изјава министерот Мисајловски го опиша денешниот ден како историски ден за армијата и Министерството за одбрана на земјата.
Мисајловски истакна дека со денешната презентација шесте хаубици „Боран“ од 105 милиметри набавени во јули официјално се ставени во употреба на армијата.
„Драго ми е што имаме навистина еден многу добар стратегиски партнер. Тоа е нашата пријателска, братска Турција. Во овој момент сакам да им се заблагодарам на амбасадорот, на аташето, но и на Министерството за одбрана на Турција и Владата на Турција. Бидејќи со ова покажуваме дека навистина сме поблиску и поблиску за многу убави работи во иднина“, рече тој.
Мисајловски, исто така, рече дека на денешниот настан добиле 4.000 униформи како дел од билатералниот договор меѓу Турција и Северна Македонија.
Мисајловски изјави дека денес е изложен само дел од опремата што ја добиле и додаде:
„Во периодот што следи, за нашите специјални сили ќе бидат додадени дополнителни артикли, меѓу кои и снајперски пушки, како и неоклопни возила.“.
Тој им се заблагодари на сите компании што дадоа поддршка на различни начини, особено на „Аселсан“ и „МКЕ“.
Лафчиски рече дека за само три месеци откако хаубиците „Боран“ пристигнале во земјата, војниците на македонската армија ги демонстрираа способноста и професионализмот што ја красат армијата.
Тој им упати посебна благодарност на своите партнери во Турција. „И, пред сѐ, на експертите од компанијата 'Аселсан' и 'МКЕ', кои рамо до рамо со нашите припадници работеа интензивно на армискиот полигон Криволак во касарната 'Мирче Ацев' и во Република Турција. Нивната стручна поддршка и несебичното пренесување на знаењата овозможија нашата армија да стане прва во Европа што го воведе ова современо артилериско вооружување во оперативна употреба“, реле Лафчиски.
