ИСТАНБУЛ (АА) - Втората сезона на светски познатата јужнокорејска „Сквид гејм“ (Squid Game) постави нови рекорди, станувајќи најгледаното шоу на Нетфликс во текот на неделата на нејзината премиера, пренесува Анадолу.

До неделата сезоната има 480 милиони часа гледаност, јави сеулската новинска агенција Јонхап, цитирајќи го Нетфликс.

Оттаму објавија дека „Сквид гејм 2“ брзо се нашла на врвот на светската листа на топ 10 на Нетфликс, влегувајќи во најпопуларната листа на платформата за рекордно време.

Од почнувањето со емитување минатата недела шоуто се најде на прво место во 92 земји, што е редок случај за продукции од неанглиско говорно подрачје.

„Сквид гејм“ прикажува таен натпревар во кој 456 играчи учествуваат во смртоносни верзии на корејски детски игри за награда од 45,9 милијарди вони (31,5 милиони долари).

Последната сезона го надмина првиот дел, кој генерираше 448 милиони часа гледаност во четвртата недела по објавувањето во септември 2021 година. Третата сезона треба да започне подоцна оваа година.

Во меѓувреме, извештајот на медиумскиот истражувачки институт „K EnterTech Hub“ процени дека Нетфликс може да заработи над 1,5 билиони вони (1,02 милијарди долари) профит од втората сезона.

Нетфликс го отфрли ова тврдење со коментар: „Не е изводливо да се процени профитот врз основа на успехот на една продукција“, објави „ЈунгАнг дејли“.