ДАКА (АА) – Педалните рикши и моторизираните трицикли и понатаму играат клучна улога во секојдневниот транспорт во главниот град на Бангладеш, Дака, каде што густината на сообраќајот и тесните улици бараат практични и достапни превозни решенија, пишува Анадолу.

Педалните рикши, кои се користат со децении, остануваат омилен избор на граѓаните поради нивната ниска цена, еколошката природа и способноста лесно да се движат низ тесните улички на градот.

Тие претставуваат составен дел од урбаната култура и препознатливи се по живописните и шарени украси, кои ги прават визуелно впечатливи и ги издигнуваат до статус на културна икона.

Покрај рикшите, значајна улога имаат и моторизираните трицикли, локално познати како „тук-тук“ или „бејби такси“, кои се користат за кратки и средни релации. Овие возила стануваат сè поприсутни во градскиот сообраќај, особено со зголемената употреба на електрични модели, што ги прави поеколошка алтернатива во споредба со класичните возила со фосилни горива.