Администрацијата на американскиот претседател Доналд Трамп објави иницијатива за соработка наречена „Pax Silica“ насочена кон создавање „силиконски синџир на снабдување“ со пет земји, во области како што се критични минерали, енергетика и инфраструктура за вештачката интелигенција, известува Анадолу.

Во соопштението на американскиот Стејт департмент детално е наведена соработката дефинирана како „Pax Silica“, предводена од САД, во која се вклучени Јапонија, Израел, Австралија, Сингапур и Јужна Кореја.

Се истакнува дека иницијативата „Pax Silica“ има цел да создаде „синџир на снабдување со силикон“ насочен кон соработка меѓу овие земји во областите на критични минерали, енергетика, инфраструктура за вештачката интелигенција, логистика, напредно производство и полуспроводници.

Во соопштението се посочува дека иницијативата „Pax Silica“, заедно со своите партнери, има цел да воспостави „траен економски поредок што ќе го отвори патот кон ерата на просперитет поддржана од вештачката интелигенција“.

Иницијативата „Pax Silica“ официјално ќе започне со потпишување декларација од претставниците на земјите што ќе се состанат на самит во текот на денешниот ден во Вашингтон.