Полскиот претседател повикува на усогласување на стратегијата за национална безбедност со онаа на САД

Полскиот претседател Карол Навроцки изјави дека Полска треба да ја усогласи својата стратегија за национална безбедност со новообјавената безбедносна мапа на патот на САД, која е остро критична кон Европската Унија, тврдејќи дека промената на политиката на Вашингтон бара од Варшава да ја приспособи сопствената доктрина, јавува Анадолу.

Говорејќи по средбата со претседателот на Латвија, Едгарс Ринкевичс, Навроцки во четвртокот рече дека намерно го одложил одобрувањето на обновената Национална стратегија за безбедност за да биде ревидирана во согласност со новиот пристап на САД.

„Лично сум задоволен и го сметам за успех на мојот кабинет тоа што не ја потпишавме Националната стратегија за безбедност и работиме на развој на нова стратегија“, изјави Навроцки, пренесе „ТВП Ворлд“.

„Гледаме дека стратегијата на нашиот најголем безбедносен сојузник, САД, сега излегува на виделина, па мора да ја приспособиме и нашата визија според стратегијата на нашиот сојузник“, додаде тој.

Американската Национална стратегија за безбедност, објавена минатата недела, сигнализира намалена улога на САД во Европа, бидејќи Вашингтон го пренасочува фокусот кон внатрешните приоритети во рамки на политиката „Америка прва“ на претседателот Доналд Трамп.

Во документот се наведува дека деновите кога САД го поддржуваат целиот светски поредок како што беше случајот со Атлас се завршени.

Навроцки рече дека оваа промена не треба да изненадува, повикувајќи се на своите лични контакти со Трамп.

„Во оваа стратегија има јасни насоки кои велат ‘Америка прва’, што беше слоган на претседателот Доналд Трамп“, рече тој.

Тој додаде дека американскиот пристап не е конфронтативен кон земјите од Централна и Источна Европа, истакнувајќи дека држави како Полска придонесуваат за регионалната безбедност и самостојно го финансираат сопствениот одбранбен систем.

Во порака упатена до САД, полскиот премиер Доналд Туск рече:

„Европа е ваш најблизок сојузник, не ваш проблем. Имаме заеднички непријатели. Тоа е темелот на нашата безбедност во последните 80 години.“

Порано, поранешниот шеф на дипломатијата на Литванија, Габриелиус Ландсбергис, оцени дека новата стратегија фаворизира „послаба Европа“, иако Вашингтон очекува континентот да преземе поголема одговорност за сопствената безбедност.

Навроцки, сепак, ја повтори критиката кон ЕУ, истакнувајќи:

„Живееме во време кога Европската Унија е во хаос. Треба да се запрашаме дали денес се движи во вистинската насока.“