СКОПЈЕ (АА) – Министерот за култура и туризам на Северна Македонија, Зоран Љутков, во рамките на својата дводневна работна посета на Република Турција, во Анкара одржа билатерална средба со својот турски колега, министерот за култура и туризам Мехмет Нури Ерсој, јавува Анадолу.

Од Министерството за култура и туризам на Северна Македонија е соопштено дека на средбата на која присуствувале и националниот координатор за туризам Акан Махмут и амбасадорот Јован Манасиевски, министрите ја нагласиле подготвеноста за конкретна соработка во клучните сектори.

„Љутков и Ерсој ја нагласија подготвеноста за продлабочување на соработката во областа на културата и туризмот преку реализација на заеднички проекти, вклучително и дигитализација на културното наследство, развој на креативните индустрии, копродукции, како и унапредување на културниот туризам“, се вели во соопштението на Министерството.

Се додава дека министрите разговарале за конкретни чекори за зголемување на бројот на турски туристи во Северна Македонија, како и за можностите за привлекување инвеститори од Турција за развој на туристичката инфраструктура.

Соговорниците се договориле во претстојниот период интензивно да работат на заеднички иницијативи кои дополнително ќе го зацврстат пријателството и партнерството меѓу двете земји.

На крајот од средбата, министерот Љутков упатил официјална покана до својот колега Ерсој во најскоро време да ја посети Северна Македонија.