ھەڵاتنی خەلکی سڤیل لە حەویجە بەردەوامە

کەرکووک - AA
نزیکەی ٨٠٠ کەسی سڤیل بە شێوەیەکی نھێنی لە شارۆچکەی حەویجە، کە لە ژێر دەستی داعش دایە ھەڵاتوون و پەنایان بۆ هێزەکانی پێشمەرگە برد.
بەرێوەبەری فەرمانگەی کۆچ و کۆچبەرانی کەرکووک عەمار سەباح بە ئاژانسی ئانادۆڵوی راگەیاند کە ٨٠٠ کەسی سڤیل بە شێوەیەکی نھێنی لە شارۆچکەی حەویجە، کە لە ژێر دەستی رێکخراوی تیرۆریستی داعش دایە ھەڵاتوون و پەنایان بۆ هێزەکانی پێشمەرگە لە خاڵی مەکتەب خالید بردووە.
سەباح ئاماژەی بەوە دا کە ئەوانەی ھەڵاتوون گشتیان خەڵکی حەویجە و ناوچەکانی دەورپشتی ئەو شارۆچکەیەن. راشیگەیاند کە بەھۆی گەمارۆی دەوروپشتی شارۆچکەکە لە لایەن پێشمەرگە و سوپای عێراق خەڵکی سڤیلی ناوچەکە ھەوڵی ھەڵاتنیان داوە بۆ ئەوەی پەنابەرنە بەر ھێزەکانی پێشمەرگە.
سەباح ئاشکراشی کرد کە لەوەتەی سەرھەڵدانی داعش ژمارەیەکی زۆری ئاوارە روویان لە ناوەندی شاری کەرکووک و دەورپشتی ئەو شارە کردووە. گوتیشی: "تاکو ئێستا ١١٧ ھەزار کەس ھاتووەتە نێو سنووری شارۆچکەکە.
یەکێک لە ئاوارەکان کە گەیشتووەتە خاڵی پێشمەرگە بەناوی سەلما ئەحمەد رایگەیاند کە بۆ ماوەی دوو ساڵە لە هەلومەرجێکی زۆر خراپ ژیانیان بەسەربردووە.
سەلما ئەحمەد گوتیشی: "خواردن و خواردنەوە نەبوو. کارەبا ھەموو رۆژێک دەپچڕا. بۆ رزگاربوون لە دەست داعش بۆ ماوەی ١٠ کاتژمێر بەسەر کێلگەکانی مین تێپەڕیون".
لە لایەکی دیکەش ئاوارەیەکی دیکەش بەناوی نەیسا محەمەد رایگەیاند کە داھاتووی منداڵەکانیان نەماوە و لە ناوچەکانی ژێر دەستی داعش خەریکبوو لە برسان دەمردن.
رێکخراوی تیرۆریستی داعش لەوەتەی مانگی حوزەیرانی ٢٠١٤ شارۆچکەی حەویجەی سەر بە کەرکووکی کۆنترۆڵکردووە.