"گه‌شتیاران 73 ملیۆن دۆلاریان له‌ هه‌رێم خه‌رج كردووه‌"

هه‌ولێر-AA
نه‌ورۆز مه‌ولود باسی له‌وه‌كرد كه‌ پلانییان بۆ گه‌شه‌پێدان و نۆژه‌نكردنه‌وه‌ی چه‌ند شوێنێكی گه‌شتیاریی له‌ هه‌رێمدا هه‌یه‌.

وه‌زیری شاره‌وانی و گه‌شتوگوزاری هه‌رێم، نه‌ورۆز مه‌ولود بە ئاماده‌بوونی ژماره‌یه‌ك به‌ڕێوه‌به‌ری گشتی له‌نێویاندا به‌ڕێوه‌به‌ری گشتی گه‌شتوگوزاری هه‌رێم كۆنگره‌یه‌كی رۆژنامه‌وانیی بۆ خستنه‌ڕووی ژماره‌ی ئه‌و گه‌شتیارانه‌ی كه‌ له‌ رۆژانی جه‌ژندا سه‌ردانی هه‌رێمی كوردستانییان كردبوو به‌ست.
له‌و كۆنگره‌ رۆژنامه‌وانییه‌ی له‌ باڵه‌خانه‌ی وه‌زاره‌تی شاره‌وانی گه‌شتوگوزاری هه‌رێم له‌ هه‌ولێر به‌ڕێوه‌چوو، نه‌ورۆز مه‌ولود بۆ ده‌زگاكانی راگه‌یاندن كه‌ ئاژانسی ئانادۆڵوش ئاماده‌ی بووبوو رایگه‌یاند "جێگه‌ی خۆشحاڵییه‌ كێرڤی هاتنی گه‌شتیاران بۆ هه‌رێمی كوردستان له‌ به‌رزبوونه‌وه‌دایه‌، ساڵی 2016 ژماره‌ی گه‌شتیاران به‌ به‌راورد له‌گه‌ڵ ساڵانی پێشتر زیادی كردبوو، بۆ ئه‌مساڵیش به‌ تایبه‌ت له‌ رۆژانی جه‌ژنی نه‌ورۆز زیادی كردبوو. له‌ 10 رۆژی پێش جه‌ژن و جه‌ژن و پشووه‌كانی دواتریش واته‌ له‌ نێوان رۆژانی 22ی حوزه‌یران تا یه‌كی ته‌مووز ژماره‌ی ئه‌و گه‌شتیارانه‌ی هاتوونه‌ته‌ هه‌رێمی كوردستان بریتیین له‌ 243 هه‌زار كه‌س، ئه‌مه‌ش ده‌بێته‌ دوو به‌رامبه‌ری ژماره‌ی ئه‌و گه‌شتیارانه‌ی كه‌ له‌ جه‌ژنی ره‌مه‌زانی پێشوو دوو به‌رامبه‌ر بووه‌".

وه‌زیری شاره‌وانی و گه‌شتوگوزاری هه‌رێم، نه‌ورۆز مه‌ولود هۆكاره‌كانی به‌رزبوونه‌وه‌ی ژماره‌ی گه‌شتیارانیشی گه‌ڕانده‌وه‌ بۆ به‌رقه‌راریی هه‌رێمی كوردستان له‌ رووی ئاسایشیه‌وه‌ و هه‌روه‌ها ئه‌نجامدانی چه‌ندین كۆنفڕانس و په‌یوه‌ندییه‌كان له‌گه‌ڵ كۆمپانیاكان و ئاسانكاریی حكوومه‌تی هه‌رێم له‌ بازگه‌كان و چه‌ند هۆكارێكی دیكه‌.
سه‌باره‌ت به‌و داهاته‌شی كه‌ ئه‌و گه‌شتیارانه‌ی هێناویانه‌ته‌ هه‌رێمی كوردستان و خه‌رجییان كردووه‌، نه‌ورۆز مه‌ولود گوتی: "ئه‌وه‌ی خه‌مڵێنراوه‌ هه‌ر گه‌شتیارێك له‌و ماوه‌یه‌ی له‌ هه‌رێمی كوردستان له‌و ماوه‌یه‌ ماوه‌ته‌وه‌ نزیكه‌ی 300 دۆلاری خه‌رج كردووه‌، به‌و پێیه‌ ئه‌و 243 هه‌زار گه‌شتیاره‌ی هاتوونه‌ته‌ هه‌رێم بڕی 73 ملیۆن دۆلارییان خه‌رج كردووه‌ و ئه‌وه‌ش بۆ كه‌رتی تایبه‌ت چووه‌، بۆ هۆتێل و مۆتێل و چێشتخانه‌ و شوێنه‌ گه‌شتیارییه‌كانیش و شوێنی دیكه‌ش بووه‌، ئه‌وه‌ش وایكردووه‌ بوژانه‌وه‌ به‌ كه‌رتی ئابووریی بگات".

وه‌زیری شاره‌وانی و گه‌شتوگوزاری هه‌رێم باسی له‌وه‌شكرد ئه‌و ژمارانه‌یان له‌ بازگه‌كان و فڕۆكه‌كانی هه‌رێم وه‌رگرتووه‌.

هاوكات له‌ درێژه‌ی قسه‌كانیدا باسی له‌وه‌كرد كه‌ چه‌ندین هه‌لی کار له‌و ماوه‌یه‌دا ره‌خساوه‌ بۆ ئه‌و كه‌سانه‌ی بێ كارن.

نه‌ورۆز مه‌ولود له‌ درێژه‌ی قسه‌كانیدا رایگەیاند کە له‌ پلانیاندا هه‌بووه‌ له‌ پێشتر بۆ ئه‌وه‌ی له‌ هه‌ر چوار وه‌رزی ساڵ گه‌شتیاران روو له‌ هه‌رێمی كوردستان بكه‌ن و له‌ ماوه‌ی رابردوودا له‌مباره‌یه‌وه‌ سه‌ركه‌وتووبن و ئه‌وه‌ی گرنگه‌ زیاتر ئه‌وه‌یه‌ بوونی ئاسایش و هه‌روه‌ها شوێنه‌ گه‌شتیارییه‌كان وایكردووه‌ گه‌شتیاری زیاتر روو له‌ هه‌رێمی كوردستان بكه‌ن، له‌گه‌ڵ ئه‌وه‌شدا باسی له‌ چه‌ند پلانێك كرد كه‌ ده‌یانه‌وێت له‌ رێگه‌یه‌وه‌ شوێنه‌ گه‌شتیارییه‌كان نۆژه‌ن بكه‌نه‌وه‌ و گه‌شه‌ی زیاتری پێ بده‌ن.

وه‌زیری شاره‌وانی و گه‌شتوگوزاری هه‌رێم، نه‌ورۆز مه‌ولود له‌ درێژه‌ی لێدوانه‌ رۆژنامه‌وانییه‌كه‌یدا بۆ ده‌زگاكانی راگه‌یاندن له‌ وه‌ڵامی پرسیارێكی ئاژانسی ئانادۆڵو سه‌باره‌ت به‌ ژماره‌ی گه‌شتیارانی بیانی روونی كرده‌وه‌ "به‌رێژه‌ 70 له‌سه‌دی ئه‌و گه‌شتیارانه‌ی هاتوونه‌ته‌ هه‌رێم گه‌شتیاری ناوچه‌كانی دیكه‌ی عێراقن، 30 له‌سه‌دیش رێژه‌ی گه‌شتیارانی بیانیین كه‌ له‌ ئێران و توركیا و وڵاتانی دیكه‌شن، به‌ هۆی بوونی كۆمپانیاكانه‌وه‌ كه‌ گه‌شتیار ده‌هێنن و ده‌به‌ن ژماره‌ی گه‌شتیارانی بیانیش له‌ هه‌رێمی كوردستان زیادی كردووه‌".
له‌ وه‌ڵامی پرسیارێكی دیكه‌دا سه‌باره‌ت به‌ كه‌می ئاو له‌ شاری هه‌ولێر وه‌زیری شاره‌وانی و گه‌شتوگوزاری هه‌رێم، نه‌ورۆز مه‌ولود باسی له‌وه‌كرد كه‌ بچڕانی كاره‌با هۆكاری سه‌ره‌كییه‌ له‌ كه‌می ئاو، ئه‌گه‌ر نا ژماره‌ی بیره‌كان هه‌مان ئه‌و بیرانه‌ن، به‌ڵام بیره‌كان ئێستا به‌ هۆی بچڕانی كاره‌با بووه‌ته‌ هۆكاری ئه‌مه‌، گوتیشی كۆبوونه‌وه‌یه‌ك ده‌كرێت و ئه‌مڕۆ له‌ ئه‌نجوومه‌نی وه‌زیران كۆبوونه‌وه‌یه‌ك له‌گه‌ڵ ده‌زگا په‌یوه‌ندیداره‌كان ده‌كرێت بۆ چاره‌سه‌ركردنی كێشه‌ی كه‌می ئاو.