هەولێر .. مەراسیمی جەژنی نەورۆز لە سەیرانگای دلۆپە

هەولێر - AA
بەهۆی ئەوەی ماوەی دوو ساڵە بارودۆخی سیاسی لە عێراق ناجێگیرە و هەرێمی کوردستانیش ئارامترین ناوچەی عێراقە، بۆیە لە زۆربەی شارەکانی دیکەی عێراقەوە خەڵک روو لە هەرێمی کوردستان دەکەن و لەگەڵ ئەوەشدا لەم بۆنەیە جگە لە نەتەوەی کورد، بەشێک لە ئاوارە عەرەبەکانیش کە ئێستا دانیشتووی هەرێمی کوردستانن بەشداری ئەم بۆنەیان کرد و لە سەیرانگاکان هاوشێوەی کوردەکان دەستیان بە هەڵپەڕین و کەیفخۆشی کرد.
هاووڵاتییانی ئەم شارەش بە گوڕ و تینەوە پەیامی جەژنە پیرۆزە بۆ بنەماڵەی شەهیدان و پێشمەرگەکان دەنێرن، هاووڵاتی ئەکرەم عەلی عەبدوڵڵا کە خەڵکی شاری کەرکووکە و لە شاری هەولێر نیشتەجێیە، بۆ ئاژانسی ئانادۆڵو گوتی: "سەرەتا پیرۆزبایی لە ئاژانسی ئانادۆڵو دەکەم و سەری رێز و نەوازش دادەنوێنین بۆ شەهیدانی کوردستان و جەژنە پیرۆزەش لە هەموو خەڵکی کوردستان دەکەم، بە تایبەتی برا پێشمەرگەکان چونکە ئێستا بەهۆی هەبوونی برا پێشمەرگەکان لەبەرەکانی جەنگ وا دەکات کە ئێمە بە ئارامی ئەم رۆژە بەسەر بەرین".
هاووڵاتی جومعە ساڵەیی کە خەڵکی شاری هەولێرە، ئەویش هاوشێوەی هاووڵاتییانی دیکە، پیرۆزبایی ئەم جەژنەی ئاراستەی بنەماڵەی شەهیدان و هێزەکانی پێشمەرگە کرد و لە لێدوانێکی بۆ ئاژانسی ئانادۆڵو گوتی: "جەژنی نەورۆز لە گشت پێشمەرگە قارەمانەکانی کوردستان و خەڵکی کوردستان پیرۆز دەکەم و هیوادارم ساڵێکی پڕ لە خۆشی و تەبایی بێت و ئەمساڵ خۆشتر بێت لە ساڵی رابردوو لەگەڵ ئەوەشدا هیوادارم کۆتایی قەیران و نەهامەتییەکان بێت".
ئەگەرچی ماوەی دوو ساڵە قەیرانی دارایی رووی لە هەرێمی کوردستان کردووە و ماوەی چەند مانگێک مووچەکان دواکەوتوون بەڵام هاووڵاتییان پێیان وایە نەبوونی مووچە نابێتە رێگر لە بەڕێوەبردنی جەژنی نەتەوەیی نەورۆز.
سەبارەت بە قەیرانی دارایی و بەشداریکردنی هاووڵاتییان لەم بۆنەیەدا، جومعە ساڵەیی گوتی: "بەدڵنیاییەوە قەیرانی دارایی کاریگەریی لەسەر ئەم بۆنەیە هەیە بەڵام چونکە خەڵک ئەم بۆنەیە بە بۆنەیەکی گرنگ دەزانن و کۆمەڵێک یادەوەرییان لەگەڵ نەورۆزدا هەیە بۆیە خەڵک بەشداری ئەم بۆنەیە دەکات و هەندێک شت لە ژیاندا پێویستە و راناوەستێت".
لەبارەی قەیرانی دارایی و کاریگەریی لەسەر بەشداربوونیان لەم مەراسیمەدا، هاووڵاتی ئەکرەم عەلی عەبدوڵڵا گوتی: " قەیرانەکە بەگشتیی رووی کردووەتە هەموو ناوچەکانی رۆژهەڵاتی ناوەڕاست و عێراقیش بە تایبەتی بەڵام خەڵک بەبۆنەی ئەم جەژنە پیرۆزەوە مەراسیمی خۆیان دەگێڕن و ئەم جەژنە بە سەلامەتی دەبەنە سەر".
جێی ئاماژەیە لەم رۆژەدا هەریەک لە تیمەکانی پۆلیسی هاتوچۆ و پۆلیسی فریاکەوتن و تیمە گەڕۆکەکانی تەندروستی لە سەیرانگاکاندا لە ئامادەدباشیدا بوون و چەند رۆژێکیش پێش هاتنی جەژنی نەورۆز تیمەکانی شارەوانی ھەڵمەتێکی پاککردنەوەی سەیرانگاکانی سنووری پارێزگای ھەولێریان دەست پێ کردبوو، بۆیە لە ئێستادا سەیرانگاکان بە پاکی دەبینرێن.
نەورۆز جەژنێکی نەتەوەیی کوردە و هەموو ساڵێک لە 21ی ئازار کە دەکەوێتە یەکەم رۆژی وەرزی بەهار، ئەم جەژنە بەرز رادەگیرێت و بە شایی و هەڵپەرکێ و سەیران پێشوازی لەم رۆژە دەکرێت و بەپێی هەندێ بەڵگەی مێژوویی ئەمڕۆ یەکەم رۆژی ساڵی 2716ی کوردییە.