هەولێر - AA

ئەنجوومەنی وەزیرانی هەرێمی کوردستان-عێراق لەبارەی ڕووداوەکانی سلێمانی و هەروەها دانوستانەکانی نێوان هەولێر و بەغدا کۆبوونەوە.

بە پێی ڕاگەیاندراوێک، ئەنجوومەنی وەزیرانی هەرێمی کوردستان بە سەرپەرشتی سەرۆکوەزیران مەسرور بارزانی و ئامادەبوونی جێگری سەرۆکوەزیران قوباد تاڵەبانی کۆبوویەوە.

لە ڕاگەیاندراوەکەی ئەنجوومەنی وەزیراندا هاتووە، سەرۆکوەزیران بارزانی وێڕای دەربڕینی نیگەرانی لە ڕووداوەکانی سلێمانی، ڕایگەیاندووە کە، "پێویستە کێشە و ناکۆکییەکان لە ڕێگەی یاسا چارەسەر بکرێن نەک توندوتیژی".

پەیوەنیدار بەو پرسە، مەسرور بارزانی داوای لە جێگری سەرۆکوەزیران قوباد تاڵەبانی کردووە کە ڕوونکردنەوەی پێویست بۆ ئەندامانی کابینە بخاتە ڕوو و تاڵەبانی ڕایگەیاندووە، "پیلان هەبوو بۆ تیرۆرکردنی سەرۆکی یەکێتیی نیشتمانیی کوردستان لە چوار کاتی جیاوازدا. هەر بۆیە ئەوەی کە کرا پووچەڵکردنەوە ئەو پیلانە ئاژاوەگێڕییە و چەسپاندنی یاسا بووە و ئێستاش ڕێکاری یاسایی دەگیرێتە بەر بۆ یەکلا کردنەوە ئەو بابەتە".

بەشێکی دیکەی کۆبوونەوەی ئەنجوومەنی وەزیرانی هەرێم تایبەت بووە بە گفتوگۆکانی ئەم دواییەی نێوان هەردوو حکوومەتی هەرێمی کوردستان و حکوومەتی فیدراڵ.

لەم بارەیەوە، ئەنجوومەنی وەزیران شاندی دانوستانکاری ڕاسپارد کە لە کۆبوونەوەکانی سبەینێیان کە وا بڕیارە لە بەغدا لەگەڵ هاوتاکانیان لە حکوومەتی فیدڕاڵی ئەنجام بدرێت، بەردەوام بن لە هەوڵەکانیان و پەلە بکەن لە گەیشتن بە چارەسەری گونجاو لە پێناوی هەرچی زوو دەستپێکردنەوەی هەناردەی نەوتی هەرێم لە ڕێگەی کۆمپانیای سۆمۆ.