چەمچەماڵ.. دەستگیرکردنی دوو بازرگان و چوار بەکارهێنەری ماددەی هۆشبەر

چەمچەماڵ-AA

هێزەکانی ئاسایش لە بەڕێوەبەرایەتی ئاسایشی رۆژئاوای سلێمانی دوێنێ لە بازگەی بانی مەقان، ژنە بازرگانێک و بەکارهێنەرێکی ماددەی هۆشبەریان بە ١٢٢ گرام ماددەی هۆشبەر لە جۆری کریستاڵەوە دەستگیر کرد.

لە راگەیەنراوێکی بەڕێوەبەرایەتی ئاسایشی رۆژئاوای سلێمانیدا هاتووە کە ئەو تۆمەتبارانە لە بەغداوە ئەو ماددە هۆشبەرەیان هێناوە و بەنیازبوون بیبەن بۆ سلێمانی.

تۆمەتباران بەڕەگەز عەرەبن و نیشتەجێی شاری سلێمانی-ن.

لە بەشێکی تری راگەیەندراوەکەی ئاسایشی رۆژئاوادا هاتووە ''هەرلە هەڵمەتی هێزەکانی ئاسایشی رۆژئاوادا بۆ دەستگیرکردن و رێگریکردن لەبەکارهێنەران و بازرگانانی ماددەی هۆشبەر لەماوەی ٢٠ رۆژدا، چوار کەسی دیکە دەستگیرکراون کە یەکێکیان بازرگانە و سێ کەسەکەی دیکەش بەکارهێنەرن و لەنێویاندا یەکێکیان بەڕەگەز سووری و ئەوانی دیکەش کوردن و دانیشتوی سنوورەکەن".

لەئێستادا تۆمەتباران بەبڕیاری دادوەری دادگای لێکۆڵینەوەی چەمچەماڵ بەپێی ماددەی ١٤ی هۆشبەر راگیراون و پەڕاوی لێکۆڵینەوەیان بۆ دروستکراوە و لێکۆڵینەوە لە دۆسێکانیان بەردەوامە.